АьбдулпаттахI Амирханов цIакь унни ­ДР-лул ХIукуматрал председательнал къуллугърай

Октябрьданул 28-нний МахIачкъалалив хьунни ДР-лул Халкьуннал Мажлисрал сессия. Муний АьбдулпаттахI Амирханов цIакь унни ДР-лул ХIукуматрал Председательнал къуллугърай.

Амирханов Дагъусттаннал премьер-министрну цIакь аврихлу чIурду буллунни сессиялий ивкIсса 85-гу депутатнал.
Дагъусттаннал ХIукуматрал Председательнал махъ лавхъунни парламентрал сессиялий. Премьер-министрнал барчаллагь кунни республикалул каялувчинахь, цайра вихшала дишаврихлу ва Дагъусттаннал Халкьуннал Мажлисрайн ххал дигьин кандидатшиврийн цалла цIа дишаврихлу.
Дувансса давурттал планная буслай, Амирхановлул кIицI бунни ДР-лул хъунмасса лябуккулул потенциал бушиву. «МуницIунма социал-экономикалул лябуккулул чIяруми ккаккиярттайну цайми регионнаяр махъун багьну буру. Масалдаран, республикалий дянивсса харжру ва агьалинал доходру яла яларайминнун ккаллину дур. Дагъусттаннай оьрчIал багъирдавун яргри бувгьуну бур инсантурал, школартту бур ттигу шанна сменалий оьрчIру дуклакисса. Мукуннасса тагьар дур сайки циняв арардаву, цIуллушиву дуруччаврил, коммунал инфраструктурардал, ххуллурдал.
Жунна цинявннан кIулли жула социал-экономикалул лябуккулуву цукунсса захIматшивуртту дуссарив ва хIадурну буру циняв жула хьхьичIсса масъалартту дузал буллан цасса командалуву», – кунни премьер-министрнал.
Сессиялий ххал бивгьунни цаймигу масъалартту.