Аьрасатнал музейрдал дянивсса хIала-гьурттушиву цIакь дуллалисса давурттив музейрдал зузалтрал дуллалаву гьарца чулухасса хьхьичIуннайшивур. Сентябрь зуруй Къиримнавасса, Алупка шагьрулийсса Совет Союзрал кIийла Виричу АхIмад-Хан Султаннул цIанийсса музейрал сотрудниктал Каспийск шагьрулийсса №8 школа-лицейрал музейрал коллективращал хьунабакьин бувкIун бия.
Ва 1966 шинал хIасул бувсса музей бур. ЦIубутIуй – краеведческий музей хIисаврай. 1971 шинал тIурчарив, музейран АхIмад-Хан Султаннул цIа дирзун дур. 1988 шинал школалунгу бусалардавун агьсса летчик-испытательнал цIа дирзун дур. ХIакьинусса кьини музейрал хъунмурну бур тарихрал дарсру дишайсса учитель Эседова Саният. Гьамин ванил хIарачатрайну хIасул дурну дур оьрчIал ккуран «ЧIава аметхановцы». Музейрал тарихрая балжину бувсуна Къиримнавасса хъамаллурахь, дуллуна вайннан «Юный аметхановец» хъазамрай лачIай лишаннугу, Каспийскаллал №8 школа-лицейрал лишангу. Алупкалиясса хъамалудуш Афанасьева Еленалгу бувсуна Виричувнал оьрмулувасса лахIзардаягу, музейрал давриягу. Елена Владимировнал барчаллагь увкунни школалул директор Рашид Аьбдуллаевлухь, кIива миллатрал бюхттулсса арснал аьпа хIурматрай ябуллай бушаврихлугу, дакI тIиртIуну дурсса хъамалушиннарахлугу. Ванил чIурчIав дунни Дагъусттаннайнсса цилва аьрххигу Къиримнал ва Дагъусттаннал музейрдал коллективрдал дусшиврул гьану бизлазисса аьрххи хьушиврий ва хъиндайдихьу тIайлабацIусса шаврия цуппа ххарину бушиврий.
