«Земский докторнал» тIиртIунни нузру

ХIакьину ДР-лул Минздраврал къатраву «Земский доктор» прог­раммалий давурттал дузал буллалиминнан тIитIинтIий дур нузру.

Шяраваллил кIанттай ягу 50 азара инсан ялапар хъанахъисса мюрщисса шагьрурдай хIакинну ягу фельдшерну зун гьан ччисса пишакартураща бюхъан тIий бур, районнал ва шагьрурдал цIуллу-сагъшиву дуруччаврил идарарттал хъуними хIакинтуращал хьунабавкьуну, гиккува даврийн кьамул бавриясса кьутIи чичин. Укунсса «ТIиртIусса нузардил кьини» вания тиннай Минздраврай шавантIий дур гьарца зуруй цания-ца ххуллункьини, ва му кьинилия баян баван тIий бур ччянива.
Ванияр хьхьичI хьусса «Земский доктор» программалий зун ччиминнащалсса хьунабакьаврий гьуртту хьуминнал суаллахьхьун жавабру дуллуссар республикалул цIуллу-сагъшиву дуруччаврил министр Татьяна Беляевал.
ДакIнийн бутан, «Земский доктор» программалий зун нанисса хIакинтуран паччахIлугърал дуллай дур ца миллион къуруширттал, фельдшернан – 500 азарда къуруш. Лапва архсса, гьан-бучIан захIматсса кIанттурдай зун гьан ччиминнан дуллай бур ца млн ва 500 азарда къуруш хIакинтуран ва 750 азарда къуруш фельдшертуран.
Программа «Земский доктор» щуруй дур 2012 шиная шиннай. ХIакьинусса кьининин ва программалийхчил давурттал дузал увну ур 1400 хIакин. 2021 шинал ккаккан бувну бур 170 кIану хIакинтуран ва 13 кIану – фельдшертуран.
Зунсса кIанттурду чув бу­ссарив кIул бан бюхъан тIий бур Минздраврал сайтрай. ХIакьинусса кьини шяраваллил кIанттурдай яла тIалавну бусса бур анестезиологтал-реаниматологтал, участковый терапевтътал, педиатртал, рентгенологтал.

Программалул ялувсса цаппарасса бувчIинбавуртту

Программалуву гьуртту хьун бюхълай бур так цал.
Ца кIанттая цамур кIанттай зун изан ччисса инсаннаща гьуртту хьун бюхълай бур программалуву, агарда га хьхьичIва гьуртту хьуну къаивкIхьурча.
Программалуву гьуртту хъанахъиминнансса ххисса кумагран цаппарасса районнал, шяраваллал кIанттурдай зун бувкIсса хIакинтуран дуллай бур къатта бансса аьрщи, буллай бур оьрчIан детсадрайн гьан­сса кIану.