МахIачкъала шагьрулул музейраву ттигъанну тIир­тIунни цIанихсса художник, СССР-данул Художниктурал союзрал член, ХI. ЦIадассал цIанийсса ДАССР-данул премиялул лауреат Эдуард Путерброт дунияллийн увккун 80 шин там шаврин хас дурсса ккаккия (выставка).

Му сакин дурну дур ДР-лул Культуралул министерствалул ДР-лул БакIчинал Грантрал кабакьаврийну.
Художник хъунмурчIин зий ивкIун ур театрдащал. Кка­ккия­лий дирхьуну дия спектакллан дурсса костюмирттал декорациярттал эскизру, афишартту, суратру ва видеохроника. ХьхьичIра ва ккаккия хьуну дур билаятрал агьаммур театрал музейраву – А.А. Бахрушиннул цIанийсса ПаччахIлугърал центральный театрал музейраву.
Путербротлул чIяруми давуртту мугъаятну ядуллай бур ганал кулпатрачIа. Гайннал дуллуну дур давуртту ккаккиялий дишингу. Музейрал каялувчитурал барчаллагь увкунни художникнал арс Антон Эдуардович Путербротлухь, художникнал ирс ябаврихлу.
Ккаккиялул ляличIишиву, сакиншинначитурал кIицI лагаврийн бувну, дусса дур Путербротлул театрал ирс укунсса лагрулий цалчин бивхьуну бушивруву.
«Эдуард Путербротлул цIушиннардал хьхьичIуннай дурссар Дагъусттаннал ттизаманнул магьирлугъ. Сценография, живопись, графика, плакат, скульптура – вай цимурцаннуву дур художникнал экспериментру буллан ччишиву ва щихачIав къалавхьхь­сса личностьрал «тIуркIу тIисса кIулшилул чавхь», – увкунни проектрал куратор Зарема Дадаевал.
Эдуард Путербротлул творчествалия ихтилат бунни Изобразительный искусствалул музейрал директор СалихIат ХIамзатовалгу.
Ккаккия лахъи лагантIий дур ноябрь зуруйннин.