Вай гьантрай Дагъусттаннай хьусса «Вирттаврал вахта» проектрал лагрулий Аьрасатнал Вирттал бивунни Къизилюрт шагьрулийн. Къизилюртлив бувкIун бия ОМОН-лул командирну ивкIсса 1999-ку шиналсса дяъвилул иширттал гьурттучи Загьид Загьидов ва Ингушетиянавасса полициялул майор Абубакар Костоев.

Вирттавращалсса хьунабакьаврий гьуртту хьунни жагьилтурал цачIушиннардал вакилтал, юнармейцы, Авгъан дяъвилул ветерантал, жяматийсса ишкка­ккулт. Шагьрулул администрациялул фойелуву тIиртIуну дия искусствалул школалий дуклакисса оьрчIал давурттал выставка. ОьрчIал давуртту дия Совет Союзрал ва Аьра­сатнал Вирттавран хас дурсса. Бусравсса хъамал лахъа-хъунну хьунабавкьунни «Ххувшаврил волонтертал» ва «Магьирлугърал волонтертал» кьюкьравасса оьрчIал.
Мероприятие дайдирхьунни кIиягу Виричуная бусласи­сса фильмру ккаккан даврия. Волонтертурал бавчIунни цинявннайх буклетру.
Къизилюрт шагьрулул хьунаманал цIания хъамалгу барча бувну, ихтилат бунни ванал хъиривчу Малик ПаттахIовлул.
– Терроризмалул ва экст­ремизмалул масъала ца яла цIюрувкьумур бур. Зу бурувччуссар инсантал миннуясса нигьачIаврия, жандалия ка ларсун зу буручлай бивкIссару Дагъусттан ва Ингушетия террористурая. Кьини дуркссар Дагъусттаннайх 1999-ку шинал дяъвилул ишру байбивхьусса чIумал. Тани жува хха­ссал хьуссару жула халкьуннал цашиврийну, вирттаврал къучагъшиврийну, – увкунни М. ПаттахIовлул. Ванал буллунни Къизилюртуллал шагьрулул бакIчинаясса Барчаллагьрал чагъарду Загьид Загьидовлун ва Абубакар Костоевлун.
Абубакар Костоевлулгу буллунни шагьрулул бакIчинан Вирттаврал ассоциациялул чулухасса Барчаллагьрал чагъар.
«Ватандалул Вирттаврал вахта» проектрая, Дагъусттаннал цIанихсса тарихрая бусласисса ихтилат бунни ДР-лул Миллатирттал политикалул ва диндалул иширттал управлениялул хъунама МахIаммад Даитбековлул.
Мероприятиялий хъунна­сса къулагъас дурну дия Авгъан дяъвилул темалух (1979-1989 ш.ш.). Загьид Загьидов та билаятрай къуллугъ буллай ивкIун ур. Авгъан дяъвилул ветерантурал цIания вирттал барча бунни шагьрулул Интернационалистурал союзрал председательнал хъиривчу Дада ХIакимовлул, Къизилюртуллал Хъу­нисриннал советрал председатель МахIаммад Аьбдуллаевлул, шагьрулул Жяматийсса палаталул член Азипат Шахрудиновал. Ихтилатчитурал кIицI лавгунни укунсса хьунабакьавурттал агьамшиву. Вирттаврал жавабру дуллунни шагьрулул школардал дуклаки оьрчIал, ДОСААФ-рал курсантътурал, жагьилсса призывниктурал суаллахьхьун. Шагьрулул Культуралул къатлул зузалтрал щаллу бунни патриот балайрду.
Хъирив цинявннал дирхьунни тIутIив «ЦучIав хъамакъаивтссар, цичIар хъама къарирт­ссар» стелалуцI, аьпалул хьу­сса авгъанцынан Авгъан паркраву дацIан дурсса обелискрацI. Миннал аьпалун итабавкьунни кIяласса шарду. ДакIнийн бутан, «Вирттаврал вахта» Дагъусттаннай гьашину кIилчинни хъанахъисса. Ва проектрал лагрулий жула республикалийн личIи-личIисса регионная увкIун ур 14 Виричу.