Вирттавращалсса хьунабакьаву

Вирттавращалсса хьунабакьаву

Сентябрь зурул 9-нний МахIачкъалалив Дусшиврул къатраву хьунни щалагу Аьрасатнал проектрал лагрулийсса «Вахта Героев» тIисса патриот акция. Гьашину Дагъусттаннай ва акциялун хас дурсса мероприятие кIилчинни хъанахъисса. МуницIун бавхIуну, сентябрь зурул 9-12-нний республикалул шагьрурдай ва щархъаву Аьрасатнал вирттал жагьилсса никирттащал хьунабакьлакьисса тамансса мероприятияртту хьунни. Акциялул агьаммур мурад вирттаврал гьунарду эбратран лавсун ялун нанисса ник тарбия даву бур.

Проектрал лагрулий Да­гъусттаннал жагьилтуращал, волонтертуращал, юнармейцынащал, кадетътуращал, ТОКС-рал кьюкьлущал ва жагьилтурал жяматийсса ва аьрали-патриот идарарттал вакилтуращал хьунабакьин увкIун ия Аьрасатнал 14 виричу. Аьрасатнал вирттавравух бия Владимир Аьлимов, Абубакар Костоев, Валерий Куков, ДибирхIажи МахIаммадов, Александр Чернов, Игорь Тарелкин, Анатолий Коробенков, Евгений Черняев, Аьрасатнал Вирттаврал ассоциациялул жяматийсса идаралул секретарь Ирина Лампартер, вара Ассоциациялул член Светлана Гурина.
Мероприятие дайдихьлахьисса ихтилат бунни ДР-лул миллатирттал политикалул ва диндалул иширттал министр Энрик Муслимовлул. Министрнал балжину бувсунни «Вахта героев» проектрая ва муниву гьуртту хьун бувкIсса Аьрасатнал вир­ттаврая.
«ХIакьину ва проектрал лагрулий республикалийн увкIу­нни Аьрасатнал 14 виричу. Цала къучагъшиврийну ва гьунарданийну вайннал лайкь дур­ссар «Мусил ЦIуку» – Аьрасатнал Федерациялул Виричу тIисса яла бюхттулмур награда, – кIицI лавгунни Энрик Муслимовлул.
Аьрасатнал Виричу, полициялул полковник Владимир Аьли­мовлул бувсунни Аьрасатнал Вирттаврал ассоциациялул жяматийсса организациялул даврия ва мунил хьхьичI бивхьу­сса агьамми масъаларттая. КIицI лавгунни, укунсса мероприятиярттал жагьилсса ник тарбия даврин хъунмасса кумаг буллалишиву.
Александр Черновлул дакI­нийн дуртунни 1999-ку шин, бувсунни Дагъусттаннал аьрщарай бувсса гьунардания.
Александр Черновлул Да­гъусттаннал уздансса жагьилтуран чIа увкунни цала гьунарду элмулуву, медициналуву, космонавтикалуву ва цаймигу арардаву аьч баву.
Аьрасатнал Виричу, летчик, парашютист-испытатель Игорь Тарелкиннул оьвчаву дунни жагьилтурайн Летный училищардавун буххансса.
Дагъусттаннал аьрщарайн бувкIсса Аьрасатнал вирттаврал бувсунни вирттаврал цIарду лайкь дан бувсса гьунардая.
Хъирив Ленинкантуллал 35-мур гимназиялул ТОКС-рал отрядрал бувсунни цала дачин дурсса даврия. Ихтилатирттал лях-карах вирттаврал жавабру дуллунни жагьилтурал буллусса суаллахьхьун.

Аватар

Имара Саидова

Журналист, обозреватель. Освещает культурные собыия в Лакском и Новолакском районах.

Читайте также: