Терроризмалущал талатаврил кьини МахIачкъалалив хьунни Интернационалистурал паркран хьхьичIунсса паччахIлугърал ва жяматрал ишккакку, генерал Оьмар Муртузаьлиевлул цIа дизлазисса мероприятие.
Шикку гьуртту хьунни Дагъусттаннал БакIчинал бигарду чIумуйну бартбигьлагьисса Сергей Меликов. Цала ихтилатраву ванал кIицI лавгунни Оьмар Муртузаьлиевлул 45-нния лирчусса шинну дуршиву паччахIлугърал мюхчаншиву дуруччай органнаву ва бусса оьрмулий паччахIлугърал мурадру буручлай ивкIшиву.
– Оьмар Муртузаьлиеври Авгъаннал аьрщарай миллатру дакьил баврил сиптачи хьусса, му пикри дузрайн буккан бан хъунмасса хIарачатгу бувссар. Бювхъуссар къачагътурал кьюкьраву цаннайн ца данди бавцIусса 40 азарунния ливчусса инсантал паракьат бан.
Отставкалийн увккун махъ Оьмар Муртузаьлиев каялувшиву дуллай ивкIссар Дагъусттаннал ХIукуматрачIасса Дяъвилул ветерантурал иширттаха зузисса Комитетрай, – бувсунни Дагъусттаннал БакIчинал. Ванал мукунна кIицI ларгунни Оьмар Муртузаьлиевлул ялун нанисса ник Ватан ххирану тарбия даву, Дагъусттаннал ва Аьрасатнал халкьуннал дянивсса дусшиву цIакь даву мурадрай дуллай ивкIсса давуртту.
– ЧIярусса шиннардий Оьмар Муртузаьлиев каялувшиву дуллай ивкIссар Дагъусттаннайсса авгъан дяъвилул ветерантурал суккушиннарай, ТОКС-рай, мукунна ванал каялувшиву дурссар «Назовем поименно» тIисса Аьпалул луттирал редколлегиялий, – к1иц1 лавгунни С. Меликовлул.
Оьмар Муртузаьлиевлул оьрмулия ва лайкьшивурттая бусласисса ихтилатру бунни МахIачкъалаллал мэр Салман Дадаевлул, Авгъан дяъвилул гьурттучитурал ва инвалидтурал ветеран организациярдал координациялул советрал председатель МахIаммад Ариповлул ва м.ц.
Оьмар Муртузаьлиевлул кулпат Сакинатлул барчаллагь увкунни ва дакIнийн утан бувкIминнахь.
КIицI лавгунни генералнал узданшиву, тIайлашиву, марцIшиву.
Мероприятиялул лагрулий авгъан дяъвилул ветерантуран – старшина Муса Аскерхановлун ва хъунама сержант Телей Иманаьлиевлун дуллунни аьрали наградартту.
АцIрахъул шинну ларгун махъ наградарттан цала вирттал лявкъунни.
1986-ку шинал Авгъаннал аьрщарайсса дяъвилул иширттаву ккаккан дурсса чувшиврухлу вайннан дуллунни «За боевые заслуги» медаллу.
