Лакрал театр гьуртту хьунни «Магьирлугърал ххуллункьини» акциялий

Лакрал театр гьуртту хьунни «Магьирлугърал ххуллункьини» акциялий

Сентябрь зурул 11-нний жула билаятрай цалчин хьунни щалагу Аьрасатнал акция «Культурная суббота». Акциялул сакиншинначитал бур Аьрасатнал Культуралул министерство ва гьарцагу региондалул каялувчитал.

Ва кьини Аьрасатнал мяй­цIаллий мукьрагу региондалий хьунни украсса ккаккияртту, тIуркIурду, мастер-классру, концертру ва театрал постановкартту.
Билаятрайсса эпидемиологиялул тагьар хIисаврайн ларсун, акция хьунни онлайн журалий.
Республикалул Культуралул министерствалул пресс-службалий бусаврийн бувну, «Культурная суббота» акциялий чялишсса гьурттушинна дурну дур Дагъусттаннал театрдал, республикалул муниципал сакиншиннардал аслийсса культуралул центрдал ва цаймигу магьирлугърал идарарттал.
Москавуллал чIумул 11.00 ссятраву Оьруснал театрданул ЧIивимур залланул фойераву «Одноклассники» социал сетьрал цила страницалий #культурнаясуббота ва #культурадляшкольников хештегирдалу тIайланнасса трансляция итадаркьунни Лакрал театрданулгу.
ТIайланнасса эфирданий актертурал бувккунни А. Пушкиннул (оьрус мазрай) ва лакрал шаэртурал (лакку мазрай) ссутнихасса шеърирду.
«Культурная суббота» акция аьдатравун дагьантIишиву ва му гьарца шинал сентябрь зурул кIилчинсса ххуллункьини шавантIий душиву баян бувна Аьрасатнал культуралул министр Ольга Любимовал «Таврида.АРТ» фестивальданий.

Читайте также: