Школартту баврил бущи дири буккан буван

МахIачкъалаллал мэр Салман Дадаевлул баян бунни республикалул хъуншагьрулий цIусса школартту баврил даву лябу­ккулий дуллан багьлай бушиву. Ванал бувсмунийн бувну, хIакьину шагьрулий буллай бур сайки мукьазара дуклаки оьрчIансса мукьва школа.

Шинал мутталий шагьрулул школарттай ялун ххи хьуну бур ряхазара дуклаки оьрчI. «Укун чIявусса оьрчIру ххишаврил савав, так оьрчIру чIявусса буллалалаврицIун дархIусса дакъар, чIявусса агьлу МахIачкъалалив бизлай бушивугур», – тIий ур мэр. Мунияту чара бакъа анавар буван багьлай бур цIусса школартту баврил бущи. Шагьрулий ца­ппара школарттай оьрчIру шанма сменалий занай бур дарсирдайн. Ца сменалийн бутаншиврул школартту, 35 азара оьрчIансса кIантту бан багьлай бур. Салман Дадаевлул бувсунни шагьрулий цIусса школартту буван­сса аьрщи лякъингу бигьасса иш бакъашиву, зума-къирагъирттай школартту бавриву агьалинан къулайшивуртту дакъашиву. КIицI лавгунни, цIусса школар­тту баврицIун, цIубуккан буван багьлагьими школарттахгу дагьайкунсса къулагъас дуван­сса хIарачат буллай бушиву. Капремонт дувансса программалувун 33 школа багьшиву. Ва ялагу, Салман Дадаевлул бувсунни, цIусса шин дайдишайхту школарттай къаралданухсса арцу нитти-буттахъая датIлатIисса кIанттурдугу кьукьин бувшиву, шагьрулул администрациялул бакIрайнласу бувшиву шагьрулул школардал къаралчитуран­сса харжиралсса цалва буван.