Гьашину хьхьичIва-хьхьичI школалул партардах Дагъусттаннай щябивкIссар 47 азарунниха ливчусса мюрщи дуклаки оьрчIру. Ва дуккаврил шинал дайдихьулий жулла республикалий цалчин нузкьунтту тIиртIуссар кIулшивурттал 20 ц1усса идаралий – миннува 7 школалул ва 13 оьрчIал садикрал.
Ттурша чIивитIу кьамул ансса оьрчIал садикру тIивтIуссар сентябрьданул 1-нний Дарбантуллал райондалийсса Араблинское тIисса шяраву, Казбековуллал райондалийсса Ленинаауллай; 90 чIивитIунсса садикру тIивтIуссар ЦIуссалакрал райондалийсса ДучIиннал, Шушиял ва Гьамиящиял шяраваллаву; 60 чIивитIунсса садикру Къизилюртуллал райондалийсса Кульзебрай, ЦIунтIиял райондалийсса Хутрах тIисса шяраву ва Дарбантливгу. Садикру ялагу тIивтIуссар Къайтагъуллал райондалий, Хасавюртлив, Южно-Сухокумскалий ва МахIачкъалаливсса Ак-Гель тIисса микрорайондалий.
Ттуршлий кьуя дуклаки оьрчIансса цIусса школартту тIивтIуссар Хасавюртуллал райондалийсса шяраваллаву, 500 дуклаки оьрчIансса школа – Каспийскалий.
Сентябрьданул 1-нний 600 дуклаки оьрчIансса цIусса школалул нузкьунтту тIиртIуссар Лакрал райондалийсса Гъумучиял шяравугу. Ва ххарисса иширая гьарта-гьарзану чичинтIиссар кказитрай.
Школартту ва оьрчIал садикру Дагъусттаннай бувну бур «Образование» ва «Демография» тIисса нацпроектирдал лагрулий.
ЦIуми школартту ва садикру, бухми кунма, зунтIиссар коронавирусрал азар ппив къахьунсса низамрай. Гьарца кIюрххил ххал дуллантIиссар оьрчIал цIуллу-сагъшиву, школарттал хьулух дуллантIиссар термометрия. ОьрчIру личIи-личIисса кабинетирттавух къазананшиврул, гьарца классран цанма-цанмасса класс ккаккан бантIиссар. Гьарца школалий ва оьрчIал садикирттай хIадур бантIиссар оьрчIру цаннащал ца къахьунабакьлансса низамрал график.
