Хасавюртуллал райондалий мукьва школа тIивтIунни

Сентябрь зурул 1-нний КIулшивуртту дулаврил кьини Хасавюртуллал райондалий тIивтIунни мукьва цIусса школа.

Вайннувасса ца школа бур 300 оьрчIансса кIану бусса Эндирей шяраву бувсса. Эндирейлив школа тIитIлатIисса мажлисрай гьуртту хьунни Хасавюртуллал райондалул бакIчи Жамбулат Салавов, Республикалул элмулул ва кIулшивуртту дулаврил министрнал бигарду биттур буллалисса ЯхIия Бучаев, «СМК Жилье» ООО-лул директор Аьли Аьлиев.
«Республикалул шагьрурдай ва районнай цIанасса заманнул технологиярттайн бувну бувсса цIусса школартту, садикру хъанахъиссар Дагъусттаннал БакIчи Сергей Меликовлул хьхьичI бивхьусса масъаларттавасса ца яла хьхьичIунмину. ХIакьинусса кьини Хасавюртуллал райондалий кIулшивуртту дулаврил мукьва идара тIитIаву, жул жяматран буниялагу агьамшиву дусса иш хъанахъиссар. Эндирей шяраву бувсса школа бур 300 оьрчIансса кIану бусса, шиву бур оборудованиялул дузал був­сса медкабинет, библиотека, актовый ва спортивный заллу, спорт площадкартту, столовый. Яла хъунмур ххаришивугу дур оьрчIру ца сменалий дуклан най бушиврия, школалия тархъансса чIун ххишаласса ду­сса чIумал оьрчIаща бюхълай бур цаймигу кружокирттайн, спортрал секциярттайн занан. Жул мурадгу, укунсса шартIирдай дуклан оьрчIру ва учительтал, нину-ппу ххари бавур», – увкунни Жамбулат Салавовлул.
Дагъусттаннал БакIчи Сергей Меликовлул чулуха дуклаки оьрчIру ва нину-ппу барча бунни ЯхIия Бучаевлул.
Хасавюртуллал райондалий­сса Кемсиюрт шяраву цIуну бувсса школа тIитIлатIисса мажлисрай гьуртту хьунни ДР-лул ХIукуматрал Председательнал цалчинма хъиривчу Нюсрет Оьма­ров. Кандаурауллайсса школа тIитIаврил мажлисрай гьуртту хьун увкIун ия ДР-лул элмулул ва кIулшивуртту дулаврил министрнал цалчинма хъиривчу МахIаммад Аьбидов. Вара кьини Хасавюртуллал райондалийсса Акбулатюртуллал шяраву школа тIитIлатIисса мажлисрай гьуртту хьунни ДР-лул экономикалул министр Руслан Аьлиев.