«Дагестан» РИА-лий хьунни Эритрея Республикалийсса Аьрасатнал вакил Аьзим ЯрахIмадовлущалсса пресс-коференция.
Ванал кIицI лавгунни махъсса шиннардий Аьрасатнал ва Эритрея Республикалул дянивсса арарду хьхьичIуннай хъанай душиву.
«Эритрея Республикалул хIукуматращал цачIуну жу ляхълай бивкIру кIирагу паччахIлугърал дянив уртакьшиву цIакь дансса ххуллурду. ХIакьинусса кьининийн хьхьичIуннай хъанай дайдирхьуну дуссар машлул ва экономикалул, спортрал ва регионнал дянивсса арарду.
2015 шиная шинмай уртакьну зий байбивхьуссар кIулшиву дулаврил аралуву. ХIакьинусса кьини Аьрасатнал вузирдаву дуклай буссар ттуршунниха ливчусса эритреянал студентътал.
Дуккаву къуртал дурну махъ ватандалийнмай кIура бавну, вай зунтIиссар кIивагу билаятрал дянивсса дусшиву ва уртакьшиву хьхьичIуннай даврил ялув», – увкунни дипломатнал.
ЯрахIмадовлул кIицI лавгунни республикалийн Аьрабнал чулухасса ялун бигьаву хъуннасса душиву, хаснува Саоьдуллал Аьрабусттаннал ва цачIун дур Аьрабнал эмиратирттал чулуха.
Посолнал бусаврийн бувну, Эритрея Республикалул агьалинал агьаммур сянат дусса дур шяраваллил хозяйствалуха зузаву. ХьхьичIунсса кIанттай дур бананну, нувщи, шагьнал лачIа, лачIа, памма, цитрус ва цаймигу ххяххия хьун даву, ризкьилуха, аьнакIаха зузаву ва балугъру бугьаву. Хъунисса лагрулий итабакьлай бур цIу. ХьхьичIуннай хъанай дур муси, дувсси ва цинк дуккаву.
ЯрахIмадовлул пикрилийн бувну, хъунна хъанай дур Китайнал чулуха экономикалийнсса ялунбигьаву, Эритреянаву муданма ялапар хъанахъисса китайнал инсантурал аьдад 80 азаруннийн дирну духьувкун.
ЧIаххувсса билаятирттащалсса арардал ялув ванал кIицI лавгунни ялапар хъанай бушиву кувннащал кув бавкьуну, властьрайн цу учIарчагу, ми арарду дуручлай бушиву.
Ахирданий Аьзим ЯрахIмадовлул вихшала дирхьунни Дагъусттаннаясса делегация Эритреянал Республикалийн бучIантIишиврийн.
