Пенсионертурахсса аякьа

Пенсионертурахсса аякьа

Гьашинусса шинал Аьрасатнал билаятрайсса цинявппагу, зузиссагу, къазазиссагу пенсионертуран, аьрали ва цаймигу ведомствардал аралувусса пенсионертуран дулун ккаккан дунни 10 азарда къуруш.

Пенсионертуран ка-кумагрансса арцу дулунсса пикрилия бувсунни Аьрасатнал Президент Владимир Путиннул уттигъанну хьусса «Единая Россия» партиялул съездрай.
«ХIакьинусса кьини, билаятрай пандемиялуцIун дархIуну хIасул хьусса тагьардануцIун бавхIуну, пенсионертурансса ка-кумагрансса арцу дулун­сса сипта хIакьсса хьунни. Хаснува, вай инсантуран, даруртту ва цаймигу коронавирусрая буруччаву мурадрайсса кьай-кьуй машан ласун буклай, ххишала­сса харж буккан бан багьссар. Ва ишираву инфляциягу, хьун аьркинссаннуяргу ялтту дурккунни. КIицI лавгсса цинярдагу нукьсаншивуртту хIисавравун ласун аьркинсса хьунни»,– увкунни Аьра­сатнал Президент Владимир Путиннул.
Агьалинан социал кумаг баву мурадрай итадакьлакьисса арцу дуллалиссар анаварсса бущилий пандемиялул кризисрава экономика дуккан дурну хьун дурсса доходирттая. ХьхьичI ххуттай арцуйнусса кумагру буллалиссар, кумаграх мюхтажсса ва ахIвал-хIал кIюласса инсантуран.
Дагъусттаннал захIматрал ва социал хьхьичIуннайшиврул министр Изумруд МухIуттиновал кIицI лавгунни ва ххуллух ХIу­куматрал БакIчинал бувсса хIук­му хъинну агьамсса хъанахъишиву.
«Эпидемиологиялул тагьар хIасул хьусса ппурттуву, оьрмулул бугьара хьусса инсантал хъинну захIматсса тагьарданивун багьну бивкIссар. КьатIу-шав буккан къадагъа дирхьусса ппурттуву пенсионертуран аьркинну бивкIссар хIакинтал бикIу, социал къуллугърал аякьалул зузалт бикIу, цала ичIунмай бучIан буллан. МуницIун ва цайми иширттацIун бавхIуну, пенсионертурая ххишаласса харжлугъ буклай бивкIссар. Му бакъа­ссагу, коронавирусрал къашавай хьусса ппурттувугу, ва аралуву­сса инсантал ххишаласса аякьалух мюхтажну бивкIссар. Аьрасатнал Президентнал, ва ххуллух пенсионертурал чIарав ацIаву мурадрай дурсса аякьа ххишала дакъа хъуннасса агьамшиву дусса дур», – увкунни Изумруд МухIуттиновал.
Дагъусттаннал Республика­лийсса Аьрасатнал Пенсионный фондрал отделениялул сияхIрайн бувну, 2021 шинал август зурул 1-нин бияннин региондалий ялапар хъанай ур 673122 пенсионер, миннава 124964 зузиминнал сияхIрайсса.
Ва хIукмулийн бувну, пенсионертуран ка-кумагран итадакьин тIий дур 500 млрд арцул.
Аьрасатнаву 30 млн. ххишала­сса пенсионертуран 10 азарда къуруш дирчуссар банкрал карточкалул счетрайн. Вайминнан сентябрьданул 5 байбивхьуну «Почта Россиялул» диян дуллантIиссар итадаркьусса арцу.

Аватар

Имара Саидова

Журналист, обозреватель. Освещает культурные собыия в Лакском и Новолакском районах.

Читайте также: