ДарчIунни наградартту

ДарчIунни наградартту

Дагъусттаннал агьалинал Цашиврул кьини, сентябрь зурул 15-нний, Республикалул БакIчинал къуллугъру чIумуйну бартбигьлагьисса Сергей Меликовлул паччахIлугърал наградартту дуллунни цивппа зузисса кIанттурдай хьхьичIунну, хIарачатрай зузи­сса дагъусттанлувтуран.

Наградартту дуллан хьхьичI ванал, агьали барчагу бувну, дакIнийн бувтунни ва агьамсса байрандалул таварих бавхIуну бушиву 1741-кусса шинал, цинявппагу Дагъусттаннал агьали цачIун хьуну, Ираннал Надир-шагь ххит уккан увну ивкIсса чIумуцIун. ЧIурчIав дунни 1999 шиналгу Дагъусттаннал халкьуннал бюхттулсса тарих тикрал бувшиву, Аьрасатнал паччахIлугъ парчари дуван ччисса гужирдахьхьун мадад къабуллушиву. Бущихъиял, ЦIуссалакрал районнай ополчентурал кьюкьраву республикалул гьар кIанттаясса вирттал кьянкьану бавцIуну бивкIшиву. Барчаллагьрал ча­гъарду ва цала цIа чирчусса каний дахIай ссятру дуллунни ва кьини Меликовлул 30 инсаннан. Миннавух бур хIакинтал ва учительталгу, социал учреждениярттал зузалт ва строительтал, спортсментал ва жяматий­сса ишккаккулт.
«За заслуги перед Республикой Дагестан» орден дуллунни медициналул элмурдал доктор, профессор, Аьрасатнал паччахIлугърал премиялул лауреат Сяъдуллагь Абакаровлун. Меликовлул кIицI лавгунни ва, Москавлив зий ва яхъа­най унугу, Дагъусттангу хъамакъабивтун, агьалинангу цащава шайсса кумаг буллали­сса хIакингу, аьлимчугу ушиву. Жу хьхьичIвагу бувсъссия ваналгу, 2 цайми аьлимчуналгу бакIравусса ва ссурссулийсса дурухлурду дусса къашайшалт хъин бувайсса кьяйда ляркъуну душиву ва му иширахлу Аьрасатнал ПаччахIлугърал премиялун лайкь хьушиву.
Вагу, ва кьини наградартту ларсъсса цинявппагу барча буллай буру.

Аватар

Патимат Рамазанова

Заслуженный работник культуры РД

Читайте также: