ТIЮХЧАРДАЛ МАГЬДИ
ХIакьину шин хьунни
вил аьпа бувну,
ДакIниву унугу, жущал акъара,
Вияту тихунмай цIа
дурксса лакгу.
ЩихьчIав къацIувххуну,
вичIан лавгунни.
Ина чIарав акъа
лаглай дур шинну,
На вил сурат лархъун,
чIирай цIакь дував.
Ина дакIнийн утлай,
аьпа бивуй тIий.
Ттула дустуращал на
кьини гьан дав.
Та совет заманнай
секретарьнаяр
Исвагьину ларххун
икIайвав ина.
Гьаз хьуну, нигь дакъа,
ина махъ чайва,
Хъуни къуллугъчитал
бацIан бувайва.
На ттинин ивссара
чIярусса щархъайн,
Хьунаавкьуссара
ина кIулнащал.
Гьарцаннал зумату вил
цIагу бавссар,
Дугърисса чуври тIий
ТIюхчардал Магьди.
Вил шин дувай кьини,
къурагьсса чIумал,
Цакуну ссавния цIупар увкуна.
РахIмат чIа тIутIисса
мякьсса лухччинийн
Рирщу гъаралуннил
вирхху бувуна.
Зайнуттин Мирзаев,
ш. ТтурчIи
ИНА ЛАВХЪССА ЧИРАХЪРАХ
Арс, на ина увссияв
Баргъ заваллай бу чIумал –
Аьвкъума гъили аван,
Къумама гьарта аван.
Тарбиягу увссияв
Увсса кIану бюхттул бан,
КIулну икIан оьрмулул
Оь кьини ва хъин кьини.
Пахрулийгу дуссара,
Арс, на вияту мудангу,
Чийву ххисса уну тIий
Чумартшиву, чувшиву.
Гъалгъа байни, зумату
Зумрутру дагьайну тIий.
Ша ласайни, ччанналу
Аьрщи лаллай дуну тIий.
ТалихIрал баргъ бивтнигу
Аххана къашайну тIий,
Кьини дурксса чIумалгу
ЯхIлил заллу уну тIий.
Ина лавхъсса чирахърах
Жу циняв щябикIару,
Вил аякьалул тIювай
Жу циняв цачIун шару.
Агь, ттул арс, ттул щаллу чув,
Щамарайгу щюллисса.
Ниттил буллусса ккукку
ХIалал бувссар, арс, ина!
Минажат Оьмарова
1989 ш.
КIИЯГУ УССИХА
Агь, жул аьзиз уссурвал,
Зу бияв жул оь ва ттаркI,
Ппу ва нину ливтIуну,
КIайннал кIану бувгьусса.
Зухун кIиннахуннагу
Дахчусса оьсса азар,
Заннайн лабизлайнугу,
Дайщун дуван къархьунни.
Зул чIаравгу бавцIунни
Лакрал жямат, уссур-ссу.
Дурунни зуй аякьа,
Цан хъунмасса барчаллагь!
Зул бивкIулул хажалат
Цинявннангу дюрххунни,
Хъун-мяммал цIа Магьдинал
Язину ядурну тIий.
Жул аьзизсса уссурвал,
Хъун Магьдий ва Исмяил,
Зущал архIал левщунни
Зул ужагъирттай чани.
Зул бивкIурдал кIушиву
ДухIан къахъанай буру.
Зул ххуйшиву, марцIшиву
Диял къахъанай буру.
Зул ссурвал:
Къайсар, Мисиду, Ханзада
