Маркаровлул школалун 30 шин

Маркаровлул школалун 30 шин

МахIачкъалалив хьунни Республикалул оьрчIал ва чIава жагьилтурал спортрал школалун 30 шин шаврин хасъсса шадлугъру.
Му сававну спортрал школалий хьунни щаллусса фестиваль. Мунил бусравсса хъамалну бия Дагъусттаннал БакIчи Сергей Меликов, АьФ-лул ПаччахIлугърал Думалул депутат Валерий Газзаев, ДР-лул ХIукуматрал Председательнал хъиривчу Муслим Телякавов.

Школалул директор Александр Маркаровлул бувсунни РДЮСШ-лул хIалкьазиялия, миву цIана зузисса ряхвагу секциялия, тренертурая.
Шадлугъру тIитIлай, Сергей Меликовлул бувсунни школалул лайкьну дурсса давур­ттая ва авадансса тарихрая: «30 шинал мутталий школа хьуссар оьрчIан яла сий думур, яла бусравмур кIануну, вания хьуссар республикалул футболчитурал дуссукъатта», — кунни республикалул каялувчинал.
Сергей Меликовлул тIиму­нийну, Александр Маркаров хъанахъиссар цIа дурксса совет футболчи, бавкьусса голлу хIисавну – рекордсмен. Александр Ашотович хьуссар МахIачкъалаллал «Динамо» командалул яла хьхьичIунма футболчигу, «Анжи» клубрал гьану бивзмагу. Вай шиннардий тамансса давуртту дурну дур, ми давуртту ттинияр тихуннайгу дуллан аьркинни.
Сергей Меликовлул школалул каялувчинан, тренертуран ва оьрчIан чIа кунни цIу-цIусса хьхьичIуннайшивуртту, рекордру, ххувшавуртту.
Барча буллалисса махъру лавхъунни Валерий Газзаевлулгу.
Шадлугъру лахъи ларгунни республикалул творчествалул коллективирттал концерт даврийну.

 

Читайте также: