«Дагъусттаннал футбол зана хьунтIиссар премьер-лигалийн»

Александр Маркаров

Республикалул оьрчIал ва чIава жагьилтурал спортрал школалул каялувчи Александр Маркаровлул бувсунни РДЮСША-лул юбилейрал хIакъираву, цува циван къалавгссарив «Спартакравун» ва «Зенитравун» ва цаймигу суаллахьхьун дуллунни жавабру.

– 1970 шинал вийн оьвкуну бия Москавуллал «Динамолувун», яла «Спартакравунгу» нану тIий та чIумал тай командарттал тренерну ивкIсса Константин Бесковлул. Циван къалавгссияв ина СССР-данул чемпионатрал лаваймур даражалул лигалул клубирттавун?

– КутIану бусан, та чIумал МахIачкъалалив ттун оьну ба­къая, кIану бавкьуну бия, къалавг­ссияв.

– Махъсса шиннардий Александр Маркаровлул оьрмулулгу, даврилгу мяънану хъанай бур Республикалул оьрчIал ва чIава жагьилтурал спортрал клуб, жяматраву мунийн учай «Маркаровлул школа». Гьашину школалулгу, виллагу юбилей хъанай дурив, Александр Ашотович?

[pullquote]– ЦIана школалий ур 2500 оьрчI, миннан лахьхьин буллай ур
70 пишакар.[/pullquote]

– Гьашину хъанай дур 30 шинал юбилей Имам Шамиллул проспектрайсса школалий зий, муниннин жу цимилагу даххана дурссар жулла адрес: жу вардиш хъанай буссияв цал «Спартакрал» майданнив, яла политехнический техникумраву.

– ЦIана цукунсса дур школалул тагьар, дузалшин?

– ЦIана школалий ур 2500 оьрчI, миннан лахьхьин буллай ур 70 пишакар. Футболдануяр ххишала жучIа лахьхьин байссар волейболданий буклан, чIатIаракI ритлан, тхеквондолий буклан, боксрай, каратэлий, шахматирттай буклан.

– Школалий тарбия бувминнавух бурив Аьрасатнал чемпионталгу?

– Бур Михаил Куприянов ва Нарик Сирхаев. Бур цаймигу цIа дурксса футболчитал – Будун Будунов, Руслан ва Камил Агъаларовхъул, Шамил Лахиялов, Аьли ХIажибеков.

– Дагъусттаннал футболданул ялун бучIантIимур цукунсса бур, вил пикрилий?

– Дагъусттаннал БакIчинал жула футболданух дуллали­сса къулагъас хIисавравун ласурча, Дагъусттаннал команда чIал къархьуну цIунилгу дуклантIиссар премьер-лига­луву.

– ЦIанасса ппурттуву кIилчинмур лигалуву дуклай дур Дагъусттаннал 3 команда. Ина цумунил болельщикра?

– Цайми регионнал командарттащал буклакийни шаннагу командалух дакI цIий икIара, цанчирча гьарца командалуву жу тарбия бувсса оьрчIру буну тIий. Канийсса ца кIиссуран цIунцIия хьурча, ливчIмигу цIун бикIайхха…