Ларгсса нюжмар кьини Расул ХIамазатовлул цIанийсса Национал библиотекалуву Дагъусттаннал информациялул ва печатьрал министр УмархIусман ХIажиев хьунаавкьунни республикалул чичултращал.

Ва дия «Современный литературный процесс на языках народов Дагестана: состояние и тенденции» тIисса цIанилу ккуркки стол хIисаврайсса мероприятие. Гьуртту хъанай бия чичулт бакъагу, литературалуха зузисса аьлимтал, ХIамзат ЦIадассал цIанийсса Мазрал, литературалул ва магьирлугърал институтрал вакилтал, миллатирттал кказит-журналлал, радио-телевидениялул журналистътал, жяматийсса ишкка­ккулт.
УмархIусман ХIажиевлул бавтIцириннан дакIнийн бувтунни щалагу Аьрасатнаву сентябрь зурул 3-нний терроризмалийн къаршиминнал кьини, зулмулухьхьун биривми дакIнийн бичлачисса мероприятияртту дувайшиву.
– ХIакьину, таний кунма, кIичIирттаву пIякь учин бавуртту , терроррданул гъургъазартту дакъахьурчагу, жунма хIура буккан къабучIиссар, личIлулну бикIан аьркинссару. Дазул кьатIувсса террорристътурал кьюкьравуз гьуртту хьун лавгминнал ккал-аьдадрал жунма исват буллай бур уттигу нигьачIину душиву», – увкунни министрнал.
Гихунмайми ихтилатру бия ниттил мазурдий чичлачисса чичулт чанну бушиврия, буминнан кумаг буван багьлай бушиврия. УмархIусман ХIажиевлул кIицI лавгунни, Дагъусттаннал хьхьичIавасса журналлу ххилтIу буллалийни, республикалул чичултрал хьхьичIуннайшивуртту дахIалай учинсса даражалийсса диркIшиву.
– Ххаллилсса литература ду­ссия жулла, бюхттулсса шаэртал ва чичулт, жуварив хIакьинусса кьинигу вай нукIувами чичултрал хъаттирдай лехлайнма буру. Бюхттулминнал ххютулу танийнну бикIантIисса, цIусса, яргсса цIарду ялун личиншиврулсса хIарачат буллан аьркинну, вай уттиминнаягу наслу пахрулий бикIаншиврул, –увкунни ванал.
Гьаз бунни Расул ХIамзатовлул юбилейралмур суалгу, яру мазрайсса 15 том итабакьин хIадур хъанай бушивугу. Вай гьантрай шаэр увсса кьинилуцIун дархIуну, хасъсса мероприятияртту дикIантIишиву.