Бусалардавун агьсса къучагънан цIа куну

Сентябрь зурул 27-нний Лакрал театрданул сахIналий хьун­тIиссар Совет Союзрал Виричу МахIаммад ХIажиевлул ватандалул цIаний бувтсса оьрмулия бусласисса «Бусалардавун агьсса комдив» тIисса спектакльданул премьера.

[pullquote]

Шикку кIицI бан багьлай бухьунссар, Буттал КIанттул цIанийсса Хъунмасса дяъвилий Мусил цIуку лавсъсса цалчин­сса дагъусттанчу МахIаммад ХIажиевлул нину, ХIажиева ХIу­рубича АхIмадлул душ, лакрал миллатраясса диркIшиву.
ХIурубича хъанай бур бувагу ца зунттал хъамитайпа, Дагъусттаннал областьрал губернатор, генерал С. Вольскийл ккаккан бувну, жяматрал хьхьичI бувсса захIматрахлу св Станиславлул шамилчинмур даражалул ордендалун лайкь хьусса. Ларайсса наградалун цув лайкь бувну бур областьрал агьали цIаллил азардануя ххассал баврил цIаний бувсса захIматрахлу.
ХIурубича бувну бур Гъази-Гъумучиял округрал Хьуру­кIу­ннал шяраву. Цил душнийсса фамилия диркIун дур Чаринова, лакрал шаэр МухIуттин Чариновлул ссурахъу.
[/pullquote]

Дагъусттаннал жагьилсса драматург Марат Шахмановлул чивчусса «Легендарный Комдив. Герою Советского Союза Магомеду Гаджиеву посвящается» тIисса пьеса Лакрал театрданул бихьлай бур 2020 шинал дурххусса Дагъусттан Республикалул Грантрах.
Театрданул каялувчи Бадрижат МахIаммадхIажиевал бусаврийн бувну, Хъунмасса Буттал КIанттул цIанийсса дяъвилул темалийн жува цIунилва-цIунилгу кIура баен буллай буру дяъвилул иширттал тарихийсса агьамшивруцIун му ттизаманнул оьрмулунгу тIалавну душиврул.
– ХIакьину МахIаммад ХIа­жиевлул виричушивурттая гъалгъа тIий, жунма цал уттигу тас­ттикь хъанай бур инсаннал мяърипатрал бюхттулшиврул, жула халкьуннал яхI-къириятрал гьанурду цIакьсса бушиву. Ватан ххирашиву, ларайсса мяърипат, къучагъшиву, пишакаршиву ва, ахиргу, дяъвилий хьун дурсса виричушивурттал хьхьичIунай уллай ур МахIаммад ХIажиев ХХ-мур ттуршукулул хьхьичIунсса аьрали ишккаккултрал кьюкьравун.
МахIаммад ХIажиевлул фигуралийн, ганал инсаннал ва аьра­личунал тарихрайн кIура баявриву театрданун чIалай бур жяматраву патриотизмалул, интернационализмалул, ватандалухлу жан кьурван дан махъаллил бакъашиврул пикрирду хьхьичIунмай баврил мурад.
ХIакьсса ишру гьануну лавсъсса произведениялийну театрданун аьркинссар ккаккан дан щинал лувсса къаехърал аьрали экипажрал уссушиву ва цашиву, Ватандалийн дакI тIайлашиву, ватандалул мурадру цаламиннуяр лавайну ккаклай бушиву, ватан дуруччаврил цIаний жан дулун хIадурну бушиву – гьамин, вай хасиятирттавур жула билаятрал гуж ва цIакь даингу бивкIсса, вай хасиятирттавур миллатрал рухI дусса. СахIналий пьесалуву цачIун дурну дуссар лирикалул ва виричушиврул дайдихьу. Дяъвилул хIакьмур сахIналий ккаккан бан аьркин­ссар щинал лувсса къаехърал экипажрал члентурал хъунна­сса дусшиврийну, миллатрах ва диндалух къабурувгун дуручлай бивкIсса», — увкунни Бадрижат МахIаммадхIажиевал.
Спектакль Республикалул БакIчинал Грантрах бихьлай бухьувкун, му бикIантIий бур ­оьрус мазрай ва лакку мазрай, муниву гьурттуну бур Лакрал, Оьруснал ва Яруссаннал театрдал актертал.
Режиссер-постановщик – Дагъусттаннал халкьуннал артист Аслан МахIаммадов.
Художник-постановщик – Дагъусттаннал лайкь хьусса художник Аскар Аскаров.
Спектакль байбихьлахьиссар 15:00 ссятраву.