Лакрал театр шамилчингу хьхьичIунминнувух хьунни

Лакрал театр шамилчингу хьхьичIунминнувух хьунни

Аьрасатнал Культуралул министерствалул, Аьрасатнал Театрал ишккаккултрал союзрал ва Чачаннал Республикалул ХIукуматрал сакиншиндарайну ва нюжмардий Грозный шагьрулий хьунни билаятрал театрал магьирлугърал оьрмулуву хъуннасса агьамшиву дусса иш — щалагу Аьрасатнал Миллатирттал театрдал шамилчинмур фестиваль «Федерация».

Цалчинсса фестиваль хьу­ссар 2019 шинал Театрданул шинан хасну Аьрасатнал Театрал иш­ккаккултрал союзрал сипталийну ва Аьрасатнал Магьирлугърал министерствалул кабакьаврийну.
Фестивальданул мурадну сакиншинначитал ккаклай бур Аьра­сатнал миллатирттал дянивсса рувхIанийшиврул ва магьирлугърал арарду цIакь даву, миллатирттал мазру ва мазурдийсса магьирлугъ дуруччаву.
Агьамсса къулагъас дуллай бур миннал билаятрал хьхьичIунсса театрал гужру миллатирттал театрдайн лажинну кIура баен баврих, миллатирттал театрдал даву федерал даражалий машгьур даврих, Аьрасатнал магьирлугърал аслишиву ядаву хIисаврай миллатирттал театрдал сий гьаз даврих.
Гьамин му хIучча хьхьичIун лавсун, фестивальдания махъ Аьра­сатнал Театрал ишккаккултрал союзрал хъунама Александр Калягиннул ва Чачаннал Республикалул БакIчи Рамзан Кьадировлул хIукму бувну бия фестиваль аьдатравун рутан ва гьарца шинал дуллан. ХIукму хъинчулий ккавккун бия Аьрасатнал Президент В. Путиннул.
Фестиваль хасну дяъвилул шиннардий ппив хьуну бивкIсса театрданул труппа цIуницIа бав­тIун, материал-техническийсса база ва репертуар цIу дуккан даврил цIаний жапасса ххуллу бивтсса Х. Нурадиловлул цIанийсса паччахIлугърал драмалул театрданул гьанулий даврилгу дур цила мяъна. Гьамин, ва театр хьуну бур дяъвилул махъсса шиннардий республикалий миллатрал пикри, халкьуннал мазрал ва магьирлугърал ххазина буруччин­сса ярагъну.
– Миллатрал пикри буруччавриву миллатрал театрданул даву бюхттулсса ххуллу-ххуттай кIицI лаглай, Чачаннал Республикалул БакIчи Рамзан Кьадиров хъинну хъуннасса къулагъас дуллай ур миллатрал театрданул магьирлугъ хьхьичIуннай даврих. Ванал махъ буллусса куццуй, фестиваль цIунилгу кIура дарунни цила ватандалийн, щала дунияллийсса пандемиялух къабурувгун, Грозный шагьру цIунилгу кIура бавунни Аьрасатнал театрал магьирлугърал центрданийн, – увкунни фестиваль тIитIлатIисса шадлугърай Чачаннал культуралул министр Хож-Бауди Дааевлул. ХIакьинусса кьини Аьрасатнаву бусса бур ниттил мазурдий зузи­сса 200 миллатрал театр. Фестивальданий ккаккан бан миннува Аьрасатнал Театрал ишккаккултрал союзрал Экспертный советрал, хьхьичIра ххал дурсса видеоматериаллал хIасиллайн бувну, язи бувгьуну бур 11 региондалиясса 14 спектакль. Ва базилух фестивальданий гьуртту хьунни Хакасия, Татарсттан, Саха (Якутия), Къарачай-Чаргас, Къабардин-Балкьар, Карелия, Алтай, Коми, Марий-Эл, Чачан ва Дагъусттан республикарттаясса миллатирттал театрду.
Сий хъуннасса фестивальданий гьурттушинна дансса тIайлабацIу шамилчингу хьунни А. Къапиевлул цIанийсса Лакрал паччахIлугърал музыкалул ва драмалул театрданунгу.
Ва базилух фестивальданул хъамал ва тамашачитал хIайран бунни хъунасса Шекспирдул ца яла цIанихсса ва аькьлу куртIсса, гьавас бутлатисса пьесалиясса спектакль «Тарс мютIи баву».
Режиссер-постановщик – Ухссавнил АьсатIиннал ва Къа­бардин-Балкьарнал лайкь хьусса артист Гиви Валиев.
Художник-постановщик – Лариса Валиева.
Режиссер, театрданул тарихчи Алексей Никольскийл Лакрал театрданул каялувчи Бадрижат МахIаммадовахьхьун буллунни фестивальданул диплом.
Фестивальданул директор, Х. Нурадиловлул цIанийсса Чачаннал драмалул театрданул каялувчи Хава АхIмадовал Лакрал театрданул коллективран фестивальданул лишан пишкаш дуллай, барча кунни спектакльданул тIайлабацIусса гьурттушинна. КIицI лавгунни ларгсса кIира фестивальданийгу жула театрданул труппа ккалли бувну бивкIшиву ца яла ябацIансса ва яргсса труппалун. Лайкьсса даражалий кьамул бувну бивкIшиву тамашачитурал спектакллу («Камаллул Башир» ва «Жорж Данден». КIирагу Да­гъусттаннал халкьуннал артист Аслан МахIаммадовлул постановкарду).
Бадрижат МахIаммад­хIажие­вал барчаллагь увкунни фестиваль лавайсса даражалий сакин даврихлу, хъамал хIурматрай кьамул баврихлу.
Спектакльданул кьимат биш­лашисса батIаврий Аьра­сатнал хьхьичIунсса театрал критиктурал, Марина Корчаклул, Борис Морозовлул, Алексей Никольскийл, Екатерина Морозовал, Елена Покорскаял, Андрей Пашниннул, Дмитрий Родионовлул, Андрей Ястребовлул ва цайминнал кIицI лавгунни Лакрал театрданул актертурал творчествалул потенциал лавайсса бушиву. ЧIурчIав дуллай бия, Аьрасатнал хъунисса театрдугума хьхьичIун къашайсса, Шекспирдул спектакль бишин чIивисса миллатрал театр сисаву хъинну жаваблувсса ша хъанахъишиврий.
Кабакьиннав Лакрал театрданул коллективрацIун ванияр тихунмайгу Дагъусттаннал теат­рал магьирлугърал ттугъ бюхттулну лавсун бачин!

Читайте также: