Муса Маннаровлул цIанийсса школа тIивтIунни Гъумук

Муса Маннаровлул цIанийсса школа тIивтIунни Гъумук

Ва нюжмардий Лакрал райондалул оьрмулуву хьунни, агьали чIярусса шиннардий ялугьлай бивкIсса, хъинну агьамсса иш. ЦIусса дуккаврил шин дайдихьулул кьини Гъумук тIивтIунни, ттизаманнул ду­ккаврил шартIирдал лащу-щаллу бувсса, 600 дуклаки оьрчIансса цIусса школа. Школалун дирзун дур миллатрал язисса арс, Совет Союзрал виричу, Муса Маннаровлул цIа.
Школалухьхьун дуллуну дур Гъумучиял колхозрал хъунил шанна гектар, 20 азарда квадрат аьрщарал. Шикку дурну дур шанна зивулийсса типовойсса къатри, гьарза-гьартасса спортзал, актовый зал ва пищеблок, интерактив доскардащалсса, гьарца дарсирдан цанма-цанмалусса кабинетру, библиотека.
Школалул кьатIувгу биял­сса кIану буллуну бур спортрал стадиондалухьхьун – шикку бур футболданул, волейболданул, баскетболданул майданну, турникирттащалсса майдан, лечайсса ххуллурду.

Школа тIитIлатIисса шадлугърай гьуртту хьунни: ДР-лул культуралул министр Зарема Бу­ттаева; ЖКХ-лул ва энергетикалул министрнал цалчинма хъиривчу Апанни Хайдакьов; шяраваллил хозяйствалул министр­нал цалчинма хъиривчу Зураб Куччаев, ДР-лул Хъунисриннал советрал хъунаманал хъиривчу Сиражуттин Илиясов, Жяматийсса Палаталул хъунаманал хъиривчу Ссапар Аьбдуллаев, ДР-лул Халкьуннал Мажлисрал «Единая Ро­ссия» партиялул Лакрал райондалул чулуха депутатну нанисса кандидат Марат Илиясов, «Дараччи» фондрал хъунмур Гулшан Хасаева ва чIявусса цаймигу бусрав­сса хъамал.
Шадлугъ дачин дурну ия Дагъусттан Республикалул культуралул лайкь хьу­сса зузала Супиян Оьмаров. Хъамаллурахь ала-ссаламгу бувну, Лакрал райондалул бакIчи Юсуп МахIаммадовлул барча дунни учительтурахь, дуклаки оьрчIахь ва нитти-буттахъахь цIусса дуккаврил шингу, цIусса школагу.
ЧIа увкунни тIайлабацIурттал ва хьхьичIуннайшивурттал авадансса ду­ккаврил шин. Барчаллагь увкунни школа бан кабакьу бувминнахь, давурттал чIарав бавцIуминнахь, чIирисса духьурчагу, гьурттушинна дурминнахь.

ЦIусса школа тIитIаву ванал кIицI лавгунни, так ца райондалул бакъасса, щала республикалул социал оьрмулуву хьусса агьамсса ишну.
Республикалул инвестиционный программалул лагрулий, 2009-ку шиналва буллай байбивхьусса школа, къуртал бан лахъи лагаврил савав дурчIин дуллай, райондалул бакIчинал бувсунни, школа буллалаву дацIан дангума ччай бивкIшиву, оьрчIру чансса бушиврийн бувну. Амма цащава бювхъушиву республикалул каялувчитуран бувчIин бан, зунттаву оьрмулул тарг байкъалитIуншиврул хьхьичIва-хьхьичI аьркинну бушиву ттизаманнул тIалавшиннардацIун бавкьусса школартту.
«Укунсса лагрулул агьамшиву дусса объектру буллалисса чIумал, ххуй чулийннай даххана хъанахъиссар жула райондалул чIалачIингу. ЦIусса школартту баврил агьамшиву хъуннасса дур хасну хIакьину, жула хьхьичI кIулшиву дулаврил даража лавай дансса мурадрай. ХIакьину жучIава цIусса школа тIитIаврил ккаккан буллали­ссар республикалул каялувчитурал дачин дурсса социал политика. Республикалул бакIчинал буржру чIумуйну биттур буллалисса Сергей Меликовлул августовский совещаниялий бувсунни, кутIасса чIумул мутталий Дагъусттаннай бувну, къуртал бантIий бушиву 100 кIулшиву дулаврил идара. Ванал ялагу кIицI лавгунни сентябрь зуруя тийнмай ххи бантIий бушиву педагогикалул зузалтрал харж», – увкунни Юсуп МахIаммадовлул.
Бувсунни Гъумучиял школалул авадансса ва цIанихсса школалул тарихрая.
Республикалул бакIчинал цIания райондалул агьали барча буллай Зарема Буттаевал кIицI лавгунни, Гъумук цIусса школа бан хъунмасса хIарачат бувшиву райондалул бакIчи Юсуп МахIаммадовлул.
Ихтилатру бунни Сиражуттин Илиясовлул, Сапар Аьбдуллаевлул.
Гъумучиял школалул директор Соня Макаевал барчаллагь увкунни район­далул бакIчитурахь, ттизаманнул тIалав­шиннардацIун бавкьусса школа баврихлу.
«Гъумучиял школалухьхьун райондалул каялувчитурал дуллуну дур яла буллугъмур аьрщарал биялсса бутIа. КIулшиву дулаврищал, хьхьичIунсса кIанттай дикIан аьркинссар тарбиягу. ХIакьину жува вардиш хьуну буру чIявусса мурадру арцух щаллу буллай. Амма тарбия арцух машан ласун къашайссар. Мунийн бувну, дуклаки оьрчIал нитти-буттахъахь ттун учин ччимур вари. Аьрщарай чIатIа дирзун, зул оьрчIая парча къабагьантIиссар. Зувагума мукунсса давривух хIала буххарча, оьрчIангу гъира багьантIиссар. ЗахIматралли инсан бюхттул айсса», – увкунни Соня Макаевал.
Школа тIитIаврил лишанну хьусса аьтIласрал ятIул лента кьувкьунни Зарема Буттаевал ва Юсуп МахIаммадовлул.
Муния махъ хъамаллурал ххал бунни школа. Цинявппа кIицI лаглай бия ттизаманнул тIалавшиннардацIун бавкьусса ва гьарца шартIирдал лащу-щаллусса школазунттал районнай ттигу бакъашиву.
Шадлугъ къуртал хьунни райондалул магьирлугърал зузалтрал ва Гъумучиял оьрчIал магьирлугърал школалий тарбия хъанахъиминнал хIадур дурсса концертрайну. Муний гьурттушинна дурунни «Дагестан» тIисса балайрдал ва къавтIавурттал ансамбльданул.

 

 

 

 

 

Читайте также: