Вай гьантрай дайдирхьунни республикалул даражалийсса къулагъас футболданух дуллан аьркиншиврийсса сипта. Мунийн бувну жулгу пикри хьунни лакрал футболистуращал кIул буван кказит буккултгу. «Илчи» кказитрал редакциялул барчаллагь баян буллалиссар ва материал дузал дуван кумаг бувсса Чараватусса тарихрал учитель Сулайман МахIаммадовлуйн.
Русланнул арс Бадави ХIусайнов
Увссар 1991-ку шинал Каспийскалий, ванал нину-ппу ЧукIнатуссар. Бадави уккайссар централ защитникнал кIанай, уклай ивкIссар «Дагдизель» клубраву (Каспийск). 2011 – 2012 шиннардий ивкIссар жагьилтурал «Анжи» командалул капитанну. «Анжилул цIа дуккайсса 2010 шинал дайдихьулий, Бадави ХIусайнов мудана вардиш хъанай ивкIссар Этолущал, Карлослущал, Виллианнущал, Диарращал, Самбащал ва цаймигу цIа дурксса футболистуращал. 2012-ку шиная шинай уклай ивкIссар Азирбижаннал чемпионатрай, «Сумгаит» ва «Карабах» клубирттавух гьурттуну. Азирбижаннал чемпионатрай Бадави увкссар 272 тIуркIулуву. Еврокубокирттал 66 тIуркIулуву гьуртту хьуссар, мугу рекордран ккаллину бур. Бадави увагу ца дагъусттанлув хъанахъиссар цалла команда капитан хIисаврай майданнив дуккан дурсса: 2019-ку шинал октябрьданул 9-нний Бахрейннал цачIундур командалущалсса дусшиврийсса тIуркIулуву(счет 3:2), мукунма цаймигу тIуркIурдаву.
2012 шинал Бадави ХIусайнов увцуну ивкIссар билаятрал цачIундур командалувун. Аьрасатнал командалуву цалчин гьуртту хьуссар Индиянащалсса тIуркIулуву. Мунал бавкьуссар ца гол 2021 шинал июньдалул 2-нний Белоруссиянащалсса тIуркIулуву. Италиянащалсса, Португалиянащалсса, Хорватиянащалсса тIуркIурдаву ХIусайнов ххаллилну гьуртту хьуссар .
Бадави ХIусайнов хъанахъиссар Азирбижаннал 7-ла чемпион, 3-ла Азирбижаннал кубок лавсма.
Хъиривгу буссар