Космина Исрапиловащалсса хьунабакьавуртту

Сентябрь зурул 14-нний Расул ХIамзатовлул цIанийсса Да­гъус­­ттаннал Национал библиотекалул коллективрал МахIачкъалаллал 58-мур школалий халкьуннал шаэр Космина Исрапиловащалсса хьунабакьаву дунни, ванил ялун нанисса юбилейран хасну.
Национал библиотекалул культуралул программардал отделданул хъунмур библиотекарь Муслимат Абакаровал цилва ихтилатраву кIицI лавгуна библиотекалул ва 58-мур школалул ччянияцIара дусшиврийсса арарду душиву, ва хIакьинусса мероприятиегу му дусшиву цIакь дуллалисса давуну хъанахъишиву. Космина Исрапиловал бувсуна цила оьрчIшиврия, оьрмулул ххуллия, студент чIуннардия. Ккаккан дуруна ванил творчестволун хас дурсса видеофильмгу. Дуклаки оьрчIал хIадур бувну бия Косминал шеърирдал литературалул композиция. Дюхханну ккалай бия поэтессал назмурду. Асар хьунну бувккуна цила Косминалгу бювхъусса шеърирду. Национал библиотекалул зузала АхIмад Хайбуллаевлул барчаллагь увкуна поэзиялул мажлисрай гьуртту хьуминнахь, пасихIсса мукъул кьимат кIулну оьрчIру тарбия буллалицириннахь.

Вара кьини Космина Исра­пиловах ялугьлай бия МахIач­къалаллал 46-мур школалул коллективгу. Дагъусттаннал агьалинал Цашиврул кьинилун хасъсса байрандалийн оьвкуну бия Косминайн. Ванил бувсуна байрандалул тарихрая, оьрус мазрай ва лакку мазрай бувккуна цилва шеърирду.
Бусан ливчIунни гьашину ноябрь зурул 23-нний Космина Исрапиловал юбилей душиву. Поэтессал, чичул, публицист ва жяматийсса ишккакку, Дагъусттаннал ПаччахIлугърал премиялул лауреат, кьунниха ливчусса луттирдал автор Космина Исрапиловал юбилейрал хъиндайдихьу лайкьсса даражалийсса хьунни. Гихунмайгу тIайлабацIу баннав!