«Каспий» форумрай духхинтIиссар грантру

Сентябрь зурул 25-30-нний Избербаш шагьрулийсса «Прибой» санаториялий хьунтIиссар VIII Дунияллул халкьуннал дянивсса жагьилтурал форум «Каспий-2021». Мунин хас бувсса пресс-конференция хьунни «Дагестан» РИА-лий.

Микку Дагъусттан Республикалул жагьилтурал иширттал министр Камил Саэдовлул бувсунни гьашинусса форумрал лагрулий хьунтIишиву хьхьичIминнуй къабивкIсса щалагу Аьрасатнал жагьилтурал проектирдал конкурс. Ваний духхинтIиссар Жагьилтурал иширттал Федерал агентствалул грантру. Яла лахъмур грант дусса дур 1 миллион къуруширттал.
Гьашинусса форум цурдагу хас дурну дусса дур ДАССР сакин хьуния шиннай 100 шин шаврин.
Форумрай гьуртту хьун тIий бусса бур Аьрасатнал 45 субъектраясса жагьилтал, гьарца субъектрая – ацI-ацIа, цинявппагу – 450-ннийн бивсса.
Камил Саэдовлул кIицI лавгунни, Жагьилтурал иширттал Федерал агентствалул къулагъас ва кабакьаву сававну, шиная шинайн хъун хъанай бушиву ялун нанисса никирал ва форумрахсса гъира ва чIяву хъанай бушиву муний гьуртту хьун ччисса жагьилтал.
«Гьашину ва форумрай гьуртту хьун буллуну бия 1500-нниха ливчусса аьрза. Вайннува форумрал дирекциялул личIи бантIиссар хьхьичIва-хьхьичI конкурсрайнсса проектру ккаккан бувми ва дуккавриву ва жяматийсса оьрмулуву чялишсса студентътал, – увкунни министр­нал.
Форумрайн оьвкуну бусса бур Республикалул БакIчинал буржру чIумуйну биттур буллалисса Сергей Меликовлуйн, ХIукуматрал хъунама АьбдулпаттахI Амирхановлуйн ва жагьилтурал иширтталсса буллалисса вице-премьер Муслим Телякавовлуйн.
Форумрал бусравсса хъамалну хьун тIий бусса бур «Трезвая Россия» федерал проектрал каялувчи Султан Хамзаев ва «Мы Вместе» акциялул вакилтал.
Жагьилтурал министрнал кIицI лавгунни форум хьун тIий душиву республикалийсса эпидемиологиялул тагьардануцIун бавкьуну.
Форумрал директор Эседуллах Салаховлул бувсунни форумрал агьамми ххуллурдая.
ДакIнийн бутанну, Дунияллул халкьуннал дянивсса жагьилтурал форум «Каспий» дуллалиссар 2011 шиная шиннай, цувгу хъанахъиссар студентътурал цила каялувшиндарал органнал даву хьхьичIуннай даврил цIанийсса социалсса ва кIулшиву дулаврил проект.