Вай гьантрай, хар-хавар бакъасса оьзру хьуну, лавгунни дунияллия Къяннал шяраватусса Кьурбаннул ва Гъумучатусса Светланал арс Исрапилов Аьбдурашид.
Увссар Аьбдурашид 1976 шинал МахIачкъалалив. 1998 шинал къуртал бувссар Дагъусттаннал паччахIлугърал университет, физикалул факультет. Москавуллал институтраву (Институт стали и сплавов) бувккуссар аспирантура.
2001-2013 шиннардий зий уссия Пробирный Надзорданул паччахIлугърал инспекциялул структурардай, цал Подмосковьелий, яла Москавуллал Централ инспекциялий. Зий уссия Санкт-Петербургливсса Северо-Западный округрал инспекциялул хъунаманал хъиривчуну. Махъсса шиннардий зий уссия ювелир индустриялий консультантну.
Тарбия буллай уссия арулла шинавусса арс Кьурбан, мукьра шинавусса душ Милана. Аьбдурашид уссия чув зурчагу, бюхъу-бажар бусса, даврил мухIлу-хIин ххуйну кIулсса, архIал зузиминнащал хIал бавкьусса, дакI-аьмал хъинсса инсан. Ва дунияллия лагаврил кьурчIишиву кIидачIлай, жижара буллай буру ниттихь Светланахь, уссихь Арсеннухь, ссурваврахь Халун-Качардухь, Оксанахь, циняв гъан-маччацириннахь. Цув алжаннул ххари аннав, гьаттай нур дизаннав, ванан къабуллумур оьрмулул бутIа оьрчIан ххи бувну лякъиннав!
Къяннал ва Гъумучиял жямат