ЦIусса хаварду кутIану

ЦIусса хаварду кутIану

Заназин дуллалаврихлу миллион доллардал

Узбакисттаннал Туризмалул ва спортрал министерстволул баян бунни, заназин дуллалаврихлу цалва агьулданул гъинтнил лажиндарай ца миллион доллардал лявкъушиву. Июль зурул 10-нния байбивхьуну, сентябрь зурул 13-ннийн бияннин, гьантлун 10 азарва ша лавсъсса инсаннан тайннал багьа булайсса бур. АцIазарва шаттирахлу гьантлун шаназарва сум хIисаврай ( 0,3 доллар). Зуруй цал 28 доллар булайсса бур райондалий ягу шагьрулий яла чIявуми шаттирду лавсминнан. Яла чIявусса шаттирду (1,9 миллион ша) лавсма – ххув хьума ур Ташкантлиясса, 34 шинавусса Улутбек Тоиров. Шаттирдал ккал дувайсса дур мобил приложениялий. Бахьтта заназиминнан багьа буллантIисса хIукму буккан бувну бур тайннал президентнал, агьалинал цIуллушиву дуруччаву мурадрай, 2020 шинал октябрь зуруй.

ДучрацIун дархIусса аьдатирттал центр

Москавлив ВДНХ-лий дучрацIун дархIусса миллатирттал аьдатирттал центр тIитIиншиву баян бунни билаятрал хъуншагьрулул мэр Сергей Собяниннул. Ванал чIурчIав дунни Аьрасатнаву яла машгьурмур музей ва спортрал парк ВДНХ бушиву, комплексраву оьрчIахь ва жагьилтурахь Аьрасатнал халкьуннал дучри хIаласса аьдатирттая бусласисса секция тIитIинтIишиву.

Балчантраясса учаларттал лу

Ихтилат балчантрая сукку бувайхту бусан, Къарачай-Чаргаснаву («Карачаево-Черкесия» РИА-лул бувсмунийн бувну) дучраясса учалартту, лувлякъуртту бусса лу итабавкьуну бур. Ва лу сакин бувсса Тимур Дотдаев ур цува къарачай-балкьарнал лувлякъуртту, учалартту батIлай уссияв, ми ппухълуннал аькьилшиврул бакIщаращину бухьувкун, яла, дучраями личIину бавтIун, лу итабакьинсса пикри хьуна тIий. Ва лу къарачай мазрай бур, ванал мурад бур, таржума бувну, лу оьрус мазрайгу итабакьинсса.

Къазаннал метролуву ниттил мазурдил поезд

Сентябрьданул 20-нний Къазаннал метролуву ниттил мазурдил поезд итабавкьушиву баян бунни. Ряхва вагон вихгу, ялатугу чIюлу бувну бусса бур миллатирттал лишаннайгу. Поездраву най бунува ниттил мазурдийсса, гъалгъалуву ччя-ччяни ишла дуллалисса калимартту лахьхьин бюхъантIий бур пассажиртураща. Калимарттугу дур татарнал, азирбижаннал, узбакIнал, гуржиял, чувашнал, удмуртиянал ва цаймигу мазурдийсса.

Аватар

Патимат Рамазанова

Заслуженный работник культуры РД

Читайте также: