Гъинтнил лагерьдай бигьалавгун бур 18 азарунниха ливчусса оьрчIру

Гъинтнил лагерьдай бигьалавгун бур 18 азарунниха ливчусса оьрчIру

Сентябрь зурул 22-нний Дагъусттаннал ХIукуматрал хъунама АьбдулпаттахI Амирханов каялувчину хьусса батIаврий дунни 2021 шинал оьрчIру гъинтнил лагерьдай бигьалагаврил хIасиллугу, ялун нанисса шинайнсса бигьалагаврил планнугу.

Премьер-министрнал бувсунни, коронавирусрал пандемиягу духьувкун, хъинну ялув бавцIуну бивкIшиву санитар тIалавшиннардугу дурурччуну оьрчIру ххуйну бигьалаганшиврул.
– Аьмну 80 лагерь буссия республикалий, 23 лагерь – шагьрурдал кьатIув, 57 – школардай. Игьалавгссар 18 867 оьрчI, – увкунни ванал.
Дагъусттаннал кIулшиву дулаврил ва элмулул министр ЯхIия Бучаевлул кIицI лавгунни хъунмур къулагъас диркIшиву ятинсса оьрчIах, интернатирттавусса, детдомирттайсса оьрчIах. Бувсунни оьрчIру бигьалагаврин 2021 шинал республикалул бюджетравату 218, 9 миллион итабавкьушиву ва лагерьдай оьрчIащал зунтIими ххуйну хIадур буваврихгу дагьайкунсса къулагъас диркIшиву, 267 инсаннал квалификация гьаз дуршиву. Бувсунни оьрчIру лайкьсса даражалий бигьалагаваншиврул цуку-цукунсса давурттаха зий буссаривгу. Ванал чIурчIав дунни «Бургъил зума» тIисса лагерьданий, гьарзат цIу ду­ккан дурну, шинал лажиндарай зунтIисса дуккаврил центр бувантIий бушиврий, бигьалаглагисса оьрчIру дарсирдая къаличIланшиврул. Бувсунни мукунма цаппара цайми лагерьдугу цIу буккан буван дакIний бушиву, миннуву бушиву ятин­сса, ялгъуз-гъаривсса ва мушакъатсса оьрчIру бигьалагавансса лагерьдугу.

 

Аватар

Патимат Рамазанова

Заслуженный работник культуры РД

Читайте также: