Шанна шадлугъ архIал

Шанна шадлугъ архIал

Дуккаврил шинал дайдихьулий, ЦIуминалийсса ЦIуссалакрал райондалул жяматран ххаллилсса бахшишну хьунни цIуну бувсса шанма садик тIитIаву. Сентябрь зурул 1-нний ЦIуссалакрал райондалий Гьамиящиял, Шушиннал ва ДучIиннал шяраваллаву тIивтIунни уттизаманнул тIалашиннардайн бувсса цIусса садикру.

2019 шинал буллай байбивхьуну бивкIсса, шаннагу щархъаву­сса садикру бувссар «ЦIуссалакрал райондалия лакрал миллат цIусса миналийн бизан баврил ва Аухуллал район цIудуккан даврин» хас дурсса хIукуматрал программалул лагрулий Федерал ва Республикалул бюджетравасса арцуйну. Вай гьантрай ЦIуминалийсса агьали ххари хьунсса иш ца уттигу хьунни. Дагъусттаннал каялувчитурал хIарачатрайну, Аьрасатнал экономикалул министерствалущал кьутIи чирчунни ЦIуминалийсса ЦIуссаккуллал шяраву 250 оьрчIансса садик бувансса. ЦIуссаккуллал шяравусса садик буллай байбишин тIий бур 2022 шинал.
ЦIусса объектру тIитIлатIисса мажлисрай гьуртту хьунни ДР-лул цифровой развитиялул министр Тамерлан Бугъанов, Лакрал миллат цIусса миналийн бизан баврил ва Аухуллал район цIудуккан даврил масълартталсса буллали­сса Дагъусттаннал ХIукуматрал Управлениялул хъунама ХIажи Султанов, ЦIуссалакрал райондалул бакIчи МахIаммад-ХIажи Айдиев, «Дирекция «Новострой» ГКУ-лул директор Аьли Аьлиев, ДР-лул Халкьуннал Мажлисрал депутат Амирхан Амирханов, ЦIуссалакрал райондалул кIулшивуртту дулаврил управлениялул хъунмур Светлана Къудаева ва райондалул идарарттал каялувчитал.
ЦIуну бувсса садикру тIитIлатIисса мажлисрай жямат барча буллалисса ихтилатру бунни МахIаммад-ХIажи Айдиевлул ва ХIажи Султановлул, барчаллагь увкунни циянявппагу гьур­ттушинна дан бувкIсса хъамаллурахь. ХIажи Султановлул цала ихтилатраву кIицI лавгунни садикру буллай, зий бивкIсса строительтурал бригадарттал цалла даву ларайсса даражалий дуршиву ва мунихлу вай лайкь хьушиву Дагъусттаннал ХIукуматрал чулухасса барчаллагьрал чагъардан.
Шадлугърал даражалий цалчин тIивтIунни Шушиннал шяравусса садик. ЦIусса миналийн бивзун махъ, шяраву садик бакъашиврийн бувну, Шушиннал жямат хъинну азурда хьуну буссия хъунмасса ххуллугу бивтун, лагма щархъавусса садикирттайн оьрчIру биян бан занай. Шушиннал жяматран цIусса садик тIитIаву ххарисса хавар хьунни. Хъамаллурал ххал бунни уттизаманнул тIалавшиннардайн бувну, оборудованиялул дузал бувсса садикравусса медкабинет, музыкалул ва физкультуралул заллу, оьрчIан дукра дайсса столовый. Ххал диргьунни мукунна хозяйствалул блокраву янна шюшайсса, кьакьан дувайсса оборудование.
Хъирив, райондалул бакIчинащалсса делегациялул Ду­чIиннал шяраву тIивтIунни цIуну бувсса «Планета» тIисса, 90 оьрчIансса кIану бусса садик. Ва бур Шушиннал шяравусса садик кунмасса. ДучIиннал жямат цIуну бувсса садик тIитIаврищал барча бунни Республикалул цифровой развитиялул министр Тамерлан Бугъановлул. Ванал кIицI лавгунни, сентябрь зурул 1-нний республикалий тIивтIусса 13 кIулшиву дулаврил идарарттава шанма ЦIуссалакрал райондалий тIитIаврийну исват хъанахъишиву цIуминалийсса район цил нирхиравун дагьлай дусса.
ДучIиннал шяраву садик тIитIаврия махъ, хъамал бивунни Гьамиящиял шяраву 140 оьрчIансса кIану бусса садик тIитIлатIисса мажлисрайн. Садикрал заведующийнал бувсунни, цIусса садикрайн оьрчIру кьамул бувну, зун хIадурну бушиву.

 

 

Аватар

Имара Саидова

Журналист, обозреватель. Освещает культурные собыия в Лакском и Новолакском районах.

Читайте также: