МахIачкъалалив 250 чIивитIунсса цIусса садик тIивтIунни

МахIачкъалалив 250 чIивитIунсса цIусса садик тIивтIунни

Сентябрьданул 1-нний МахIачкъалаллал «Ак-Гель» тIисса микрорайондалий тIивтIунни 250 чIивитIунсса оьрчIал садик. Ва тIитIаврил шадлугърай гьуртту хьунни ДР-лул ХIукуматрал Председатель АьбдулпаттахI Амирханов ва МахIачкъалаллал бакIчи Салман Дадаев.

Вара кьини хьусса видеоконференциялул режимрай оьрчIал садик тIитIаврия ДР-лул БакIчи Сергей Меликовлул бувсунни билаятрал Президент Владимир Путиннухьгу. Бувсунни Сергей Меликовлул билаятрал бакIчинахь школартту ва садикру тIивтIушиву республикалул цайми шагьрурдай ва районнайгу. Мукунма бувсунни Дагъусттаннал БакIчинал Владимир Путиннухь школартту ва оьрчIал садикру тIивтIусса шагьрурдал ва районнал бакIчитурал, учительтурал ва оьрчIал нитти-буттахъал чулухасса барчаллагьрал махъругу.
«Ак-Гель» микрорайондалий оьрчIал садик тIитIлатIисса шадлугърай ятIул лиссугу кьуркьуну, АьбдулпаттахI Амирхановлул садикрал пишакарталгу, микрорайондалул жяматгу барча бунни ва агьамсса иширащал ва кIицI бунни идара бувшиву Аьрали строительствалул хъунмур управлениялул зузалтрал.
ОьрчIал садикраву вайннал дурну дур мушакъатсса инсантурангу бигьану занансса шартIру: пандусру ва чурттурдайх ликлан-лахълан захIмат къахьуншиврул бивхьуну бур лифтру. АьбдулпаттахI Амирхановлул ва Салман Дадаевлул ялтту бувккун, ххал бунни садикгу, садикрал чIюлусса ва щюллишиврувун дахьларгсса хIаятгу.
Садикраву оьрчIан тIуркIу тIунсса ва уттубишинсса къатри бакъасса, бувну бур физкультуралул, тяхъашивурттал заллу, суратру дихьлансса къатта, медкабинет, дарсру лахьлансса ва хозяйствалул цайми-цаймигу къатри. Бур уттизаманнул оборудованиягу дирхьусса чаннасса ва дукра дукан тIааьнсса пищеблок. Шиву зунсса циняв пишакартурахь кIулшивурттал даража лахъ бансса дарсругу дирхьуссар садик тIитIин хьхьичI. Садикравун занантIисса оьрчIал 14 группалул бикIантIиссар цанма-цанмасса тIуркIу тIунсса ва бялахъансса, лагмара чапардугу дирхьусса майданну. Бур мукунма цинявннан аьмсса спортрал майдангу бувну. Баргъ кIири бувни оьрчIру ххютулу бялахъланшиврул бувну бур магъулусса майданну. ОьрчIал садикрал лагма-ялттусса ххуллурдайн асфальт бувтIун, ххуйсса ххуллурдугу бувну бур.
Ва оьрчIал садик МахIач­къалалив буллай байбивхьуссия 2019 шинал декабрьданий. Шикку дурсса давурттан аьмну харж хьуну бур 195 млн арцул.

 

Читайте также: