ЗахIматсса масъаларттал хIакъираву

Сентябрьданул 13-нний Дагъусттаннал БакIчи Сергей Меликовлул каялувшиврий ххал бивгьунни ЦУР-данул (Центр управления регионом) ашкара бувсса захIматсса масъалартту ва ми бартбигьинсса ххуллурду.

Социал сетьру ишла дуллалиминнал буруккинтту буллай бур агьали марцIсса хIачIайсса щинал дузал баврил, чани лещан къабуллалаврил, цIинцI дукьан дуллалаврил, ххуллурду баврил ва ми бакьин баврил хIакъираву. Сентябрьданул байбихьулул гьантрай гьаз буллан бивкIунни цIусса ду­ккаврил шин дайдишиннин цаппара школартту хIадурну бакъашиврул масъаларттугу.
БатIаврий бувсунни, ЦУР-данийхчил дурсса сигналлал ккаккан буллай бушиву гьарца кIанай багьайсса куццуй бартбигьлай бакъашиву кьамул був­сса хIукмурду.
Гьашину августрал 12-нния августрал 13-ннийнин дурсса давурттая бувсунни республикалул ЦУР-данул каялувчи Султан Аьбдуралимовлул. Мунал тIимунийну, захIматсса масъалалул хъирив бивзун, кIантту-кIанттурдай муниципалитетир­ттал, жяматрал ва администрациялул кумаграйну дузал байсса бур захIматсса масъала. Гьашину махъсса ца зурул мутталий ЦУР-данул кьамул дурну дур инсантурая 2800 лабизаву, миннувасса чIяруми дур МахIачкъалалия, Каспийскалия ва Дарбантлия.
Сергей Меликовлул тапшур бувну, циняв муниципалитетирттай сакин бувну бивкIссар МЦУ-рду(муниципальные центры управления). Миннул давурттал мюнпатшиврия бувсунни ДР-лул цифрардал лябуккулул министр Тамирлан Бугъановлул.
Сергей Меликовлул гьартану ихтилат бунни республикалул халкь, хаснува зунттал районнайми, энергиялул ва газрал дузал баврил хIакъираву, миннух­сса арцу итадаркьуну диркIун дур. Гьашину газрал дузал буван аьркинну бивкIун бур 26 азарва къатта ва ялунчIил, 51 азарва. Амма, цаппара районнай заявкарду цила чIумал дартIун да­къашиву сававну, давуртту къуртал къадурну дур.
Сергей Меликовлул тапшур бунни газрал дузал баврил давуртту къуртал дуван 2022 шинайннин.