ОьрчIансса назмурду

ОьрчIансса назмурду

АбутIалиб Гъапуров

ОьрчIахь

КарчI кьарити, изу лавай,
Ниттил увкумур бува,
Цал учайхту, гьаз хьулухьу
КIюрххил лавай шания.

СсахIван бувккун, ссуку дурну,
Кару, лажин шюлуша,
ЧIал къавхьуну дарсирайн гьан,
Лази-лакьи хьулухьу.

Бивсса тIутIул къюмай кунма,
Жужру канил булугьи,
НицIал ххув учайсса кунма,
Лахьхьи дирхьусса дарсру.

Щекьи, кьалан ва луттирду
Хъама мабитаванна,
Школалийн чIал къавхьуну,
Гьан хIарачат булува.


Абачара ХIусайнаев

Лакку маз

ЛяличIину нахIурхха
Зунттал уртту-тIутIал кьанкь.
ДикIайча ца тIааьнну
Лакку мазрава ришлан.

Лакку мазрал чIурдаву
Лакку бургъил чани бур.
КIа бургъил гъилишиву
КIа лакку мазраву дур.

Бурча маз авадансса:
Бусан шай учин ччимур.
КIа аваданшивруву
Щаращул жюржугу бур.

Мазру цинявппа ххуйссар,
Ххуйссар ттул лакку мазгу.
Мазру циняв пасихIссар,
ПасихIссар лакку мазгу.

Лахьхьияра пасихIну
Гъалгъа тIун лакку мазрай:
Душманнащал – кьянкьану,
Дустуращал – адаврай.

Нураттин Юсупов

Ряххилчин «Ряхва»

Цалчин школалийн
Ца оьрчI лавгуна.
Цалчин, цалчин, цалчин
«Цагу» лавсуна.

КIилчин школалийн
Га оьрчI лавгуна,
КIийла ганал кIилчин
«КIива» лавсуна.

Шамилчин, шамилчин
Га оьрчI лавгуна,
Шамийла шамилчин
«Шанма» лавсуна.

Мукьилчин, мукьилчин
Га оьрчI лавгуна,
Мукьийла мукьилчин
«Мукьва» лавсуна.

Ххюлчин школалийн
Га оьрчI лавгуна,
Ххюйла ганал ххюлчин
«Ххюва» лавсуна.

Агар бивкIссания
Кьиматгу «ряхва»,
Биллагь ласунссия
Ряххилчин «ряхва»!

Бадави Рамазанов

Циванни?

Азарва бачIирча
АцIуннайх жува,
Циванни бияйсса
Гьарцаннан ттуршва?
Чарил бюкь бутарча
Щинавун жува,
БюнбутIив бачайсса
Циванни гива?
Циванни щинацIух
ЦIу къалачIайсса?
Ссавний чанна цIуртти
Щяв къабагьайсса?
Агар къадурчIирча
ЦIусса дарс винна,
Ина учительнахь
«Циванни?» тIутIисса
Ца суалданун
Так бюхъарча вища
Жавабру дулун,
Аькьлулул щаллума
Инара ява,
Вищал бяст буванма
Акъассар яла.

МахIаммад-Загьид Аминов

КацIлул думур

КацIай, кацIай, кацI…
КацIлул ци дур? – КьацI!

ЛанцI учингу – кьацI,
КьацI учингу – кьацI,

Ххяп учингу – кьацI,
Хъап учингу – кьацI,

ТтаркI дукангу – кьацI,
Ттархь дугьангу – кьацI.

КацIай, кацIай, кацI,
ШацI къашайрив кьацI?!

КацIлул учай хIап,
На тIий ура: хIайп,

КацIлул царагу
ДикIукьай кагу!

Ссугъури Увайсов

Ттаттащал уни

Усса чIумал ттаттащал,
ЦучIав къалаяй ттущал:

Нигьа усай Сулайман,
Ливхъуну лагай Салман,

На ккаккайний къаацIай,
ХIатта, къавкъин Маммаццай.

Ккаччигу дус шай ттущал,
Усса чIумал ттаттащал.
Акъахьунссар шяраву
Ттул ттаттаяр гуж бусса.

Ттаттащал уни, ттуяр
ОьрчI акъассар ххув хьунсса.

Аьли Айдаев

Зана хьияра, къакъунт!

Ттул ссупралий ччатIгу бур,
ЧчатIул чIарав нисгу дур…
Я къабучлай буривав,
ДакI дури ссахрив луглай.

Сундарату бат хьусса
Къакъунтрах луглай дурвав?
Зунтту-зунчавух занай,
Барххултрах луглай дурвав?

Ссах баххана бав, къахънуй,
Вай вила мусил сунну?
Зунттал эмарат-барххуй,
Цан кьабитав зунттурду?

Зана хьияра, къакъунт,
Мусил суннай аргъ дизан,
Барчаман, зунттал барххуй,
Зунтту-зунчай аргъ дизан!


Аьбдул Мирзаев

Зунттаву

ЦIарай бур хъунма кIункIур,
Ттигу щаран бувасса,
КIункIурдуву чIалай бур
ЦIуртти ссав оьрчIи дурсса.

Тинмай тIурча ятту бур,
Кучу-ккучунну дурну,
Чирахъшатри хханссар тай
Яттил пар тIисса яру.

Дахьрасса дюхлугу дур
ЦIарайхгу, жуйхгу ришлай,
Жагьилсса хIухчугу ур
ЧIарав щютIуххи бишлай.

Укун иштахIсса хьхьурду
Ттун ттинингу ккаркссия,
Кьяцлул хъирттаха буклай
Тукун барз къаккавкссия.


Мирза Давыдов

Гада

Ттул буссия ца гада
ЧIивинугу зирангсса,
Ттул шаттирдай ша бизлай
Ттула хъирив бачайсса.

Дадал булайва ттун ччатI,
Щара лархъун – гъили накI,
АрхIалну кIидарчIуну,
Дулайссия гадлунгу.

Гъинттул щинавун бучIлан
Гьайссияв жу бярничIан,
Бярнил лагма тIуркIу тIун
Ххирая чIиви гадлун.

Марххалттанул къурхъ кунма
КIяласса ттул гадлуя,
Хаварвагу бакъанма
Хьунни ца гьалхха кьяца.

Утти, чIивиний кунма,
Хъирив къабачайнугу,
Нава хъун бувсса кьяца
Ттурзандалул хьхьичI ххал шай.

Руслан Башаев

Шай-къашай

– Шайрив?
– Шай.
– Ци шай?
– Шамилва ца ласурча,
Шанма шай.

– Лажинни, шайрив?
– Шай.
– Ци шай?
– Шаний шанай личIарча,
Щалла кьини зия шай.

– Мяйжанну, шайрив?
– Шай.
– Ци шай?
– Шайлул мурхьирал къяртрай
ЯтIулсса канишру шай.

– Къашайрив?
– Къашай.
– Ци къашай?
– Ца къавкъинсса
Къел къадан къашай.

Лажинни, къашайрив?
– Къашай.
– Ци къашай?
– Къурул мицIлий
Ччар дан къашай.

– Мяйжанну, къашайрив?
– Къашай.
– Ци къашай?
– ЦIан къатталу хатIалий
Кказлуй ччан бивзун,
КIюй мурччавух рирщуни,
ХIаз къашай.

Булбул Оьмариева

Ажари ва Жари

Ажари бивзунни,
Жари бивзунни,
Жарил газ лавхъунни,
КIюххи бивзунни.

Бивзунни кIюххуя
Щинал ажари,
Жарилгу дурунни
ХхунчIал ланжари.

Мазяйхъал Казбек

Цимурца хъамабиту

– Аьлий, ручка дурив?
– Шарда лирчIунни.
– Ручка лякъинссарча,
– Тетрадь бакъарив?
– Бакъар, къакIулли.
– Ярч, лувагу букки!
– Хъамабивтунни.
– ЩяикIу, щяикIу,
Банмур бакъарча,
Щукруча инава
Хъамакъаивтсса!
МахIаттал машару,
Явара, оьрчIрув,
Кувни цана цува
Хъамава ивтун,
КъаучIайссар Аьли
Дарсирайнгума.

ПатIимат Рамазанова

Дадай, ласи усру

Дадай, ласи усру
Нихъригу лахъсса,
Жула га бюрчурил
ЩикIру кунмасса.
КIяласса, кIюласса,
ЗертIа тIутIисса,
Полданийгу макьан
Дуцин бюхъайсса!

Суратру Ажу Качаевлул

Читайте также: