Дагъусттаннал Цашиврул байран-кьинилул хьхьичI гьантрай республикалий ва байрандалун хасъсса мероприятияртту дуллай байбивхьунни. Дагъусттаннал Печатьрал ва информациялул министерствалийгу хьунни вара тема аьч дуллалисса ккур­кки стол.

Министр УмархIусман ХIажиев каялувшиву дуллалисса ва давриву гьуртту хьунни Национал политикалул ва диндалул иширттал министерствалул управлениялул хъунама А. ХIажиев, РАН-далул Тарихрал, археологиялул ва этнографиялул институтрал директорнал къуллугъ чIумуйну бартбигьлагьи­сса Р. Аьбдулмажидов, ХIамзат ЦIадассал цIанийсса Мазрал, литературалул ва искусствалул институтрал директор А. Акамов, Дагъусттаннал БакIчинал Советрал вакил З. Илиясов, ДГУ-лул кафедралул хъунама М. Билалов, миллатирттал СМИ-лул вакилтал.
УмархIусман ХIажиевлул кIицI лавгунни хIакьину чIявуминнал Дагъусттаннал агьалинал халкьуннал дусшиву, цашиву цийнура цирда цIакь хьусса кунна, укун бакъа цамур куццуй къабикIан аьркинсса иш кунма кьамул бувайшиву, амма тарихраву му дусшиву ядангу, цIакь дувангу багьлагьи­сса цикссагу ишру хьушиву.
– Агьалинал дусшиврий­сса арарду ххал дигьлагьисса иш­ру цикссагу дагъусттанлувтурал бакIрачIан бувкIссар личIи-личIисса шиннардий. Ччарча Бу­ттал кIанттул цIанийсса дяъвилул чIуннардий, ччарчагу 90-ку шиннардий, мукунма 1999 шинал август зуруйгу. Агьалинал ядурссар му дусшиву. Халкьуннан бувчIлай бур, властьрал хIукмурдайну бикIу, культуралуцIун, магьир­лугърацIун, аьдатирттацIун кабакьаврийну бикIу, жура Дагъус­ттаннал цашиву куртIгу, цIакьгу дуллалишиву, – увкунни ванал.
Зикрулла Илиясовлул чIурчIав дунни агьалинал дусшиву цIакь дуллалишиврий миллатирттал кказитиртталгу, ва уттиния тинмайгу халкьуннал дусшиву ядавриву миллатирттал СМИ-лухь хъунмасса бияла бушивугу. Абуссупиян Акамовлулгу кIицI лавгунни Дагъусттаннал халкьуннал цашиву миллатирттал мазурдил лексикалулгу исват дуллалишиву. Рамазан Аьбдулмажидовлулмур ихтилат журналистътал ва историктал уртакьну зун аьркиншиврия бия.
Ахирданий УмархIусман ХIажиевлул кIицI лавгунни па­ччахIлугърал структурардугу, жяматийсса ккураннугу, активистъталгу, патриотъталгу утти­ния тинмайгу Дагъусттаннал агьалинал дусшиву гьаз давриха, махъгу, пикригу ца бувну, зунтIишиву.
Ва мероприятиялий гьурттушинна дунни «Илчи» ккказитрал хъунама редактор Руслан Башаевлулгу.