«Уттарасса аьдатру»
Сентябрьданул 15-нний, Дагъусттан Республикалул халкьуннал Цашиврул кьини, МахIачкъалалив хьунни «Уттарасса аьдатру» («Живые традиции») цIанилусса фестиваль. Дагъусттаннал халкьуннал аслийсса культуралул фестиваль сакин дурну дия Республикалул Культуралул министерствалул ва Республикалул Халкьуннал творчествалул къатлул.
Фестиваль цурда дайдишин хьхьичI цал хьунни республикалул культуралул ишккаккулт гьурттусса конференция.
«Уттарасса аьдатру» фестивальданул гала-концертрай гьуртту хьуна Дагъусттаннал шагьрурдаясса ва районнаясса творчествалул коллективру ва таксса балайчитал. Концертрал дайдихьу дурна Республикалул Халкьуннал творчествалул къатлучIасса, Хасавюрт шагьрулиясса «Эхо гор» ансамбльданул. Гихунмай, чIяву миллатру бусса жулла республикалул авадансса культура, багьу-бизу, аьдатру ккаккан дуллалисса, цаннияр ца яргсса номердащал бувккуна фестивальданул махъсса гьурттучитал.
«Каспий – дусшиврул зумарду»
Вара кьини хьунни Дунияллул халкьуннал дянивсса «Каспий – дусшиврул зумарду» тIисса халкьуннал творчествалул фестивальданул хъин-ахирну хъанахъисса «ЦIакь хъанахъувча дусшиву!» тIисса цIанилусса гала-концерт.
Фестиваль хьуссар Ухссавнил Ккавкказуллал федерал округрал дунияллул халкьуннал дянивсса культуралул коммуникация хьхьичIуннай даврил лагрулий. Фестиваль дурссар дунияллул халкьуннал дянивсса культуралул коммуникация хьхьичIуннай давриха зузисса социал-культуралул ва ихIсандалул проектру щаллу даврил «Дом будущего» Центрданул, Аьрасатнал Федерациялул Культуралул министерствалул ва Дагъусттан Республикалул Культуралул министерствалул чIарав бацIаврийну.
Фестивальданул гала-концертрай гьуртту хьунни Ставрополлал крайраясса «Оберег», Ухссавнил АьсатIиннавасса-Аланиянавасса «Нарты», Къабардин-Балкьарнал Республикалиясса «Шагди», Аьшттарханнал облатьраясса «Берегиня», Къалмукьнавасса «Айс» ансамбльлу, Къарачай-Чаргаснал Республикалул лайкь хьусса артист Ислам Салгапаров, Чачаннал Республикалиясса арамтурал вокалданул группа «Теркан аре», Ингушетиянал Республикалул лайкь хьусса артист Рахман Беков. Жулла республикалул чулуха концертрай гьурттушанна дурна «Эхо гор», «Каспий», «Поющая Чарода», «Ахъуши» ансамбльлу, «Голос равнины» цIанилусса халкьуннал хор ва цайминнал.
«Дарбант – цивилизациярттал шанбачIу»
Дагъусттаннал халкьуннал Цашиврул кьини мукунна хьунни Республикалул халкьуннал аслийсса культуралул «Дербент – перекресток цивилизаций» цIанилусса байрандалул лагрулийсса «Дагъусттаннал халкьуннал дянивсса дусшиврул байран». Байран сакин дурну дия Республикалул Культуралул министерствалул ва Республикалул Халкьуннал творчествалул къатлул.
Шадлугъравух гьуртту хьуна республикалул творчествалул коллективру.
Шадлугъру хьунни Роспотребнадзорданул тIалавшиннардугу щаллуну.
