Сентябрьданул 3-нний дакIнийн бичинну Бесланнал школалул дуклаки оьрчIру

 

Аьрасатнал календарьданий сентябрьданул 3-мур кьини хIисавссар пашмансса аьпалул кьинилун. Ва кьини билаятрай кIицI лагайссар, хIакьинусса кьинигу дакIницIух бавцIусса, Бесланнал школалий дуклаки оьрчIал жанну дуллусса иширттацIун бавхIуну, террорданул иширттаву цинявгу ливтIуцириннал аьпа абад буллалисса кьини хIисаврай.
Сентябрьданул 3-нний Аьрасатнаву кIицI лагайссар Терроризмалийн къаршину буккаврил кьинину.
З. АьбдурахIманова
Аьрасатнаву вай махъсса 20-хъул шиннардил дяниву хьуну дур ца яла оьхIалсса ва чIявусса агьалинал оьрмурду лавсъсса террорданул актру. Миннувату ца яла оьхIалмунин ва мусиватмунин ккаллиссар Ухссавнил АсатIиннал Бесланнай хьусса террорданул иш. ЧIявусса оьрчIал оьрмурду лавсъсса 2004 шинал 1-мур сентябрь щин къадакIнийссар ? Акъа­хьунссар ва пашмансса кьинилия къабавсса, къакIулсса. Шанна кьини, бургъил няв-нявтIи був­сса школалул спортрал залдануву, кIиришивруву я дукансса дакъа, я хIачIансса щин дакъа, къачагътурал ясирну увгьусса 1128 инсан – хъунмурчIин оьрчIру ва хъами. Ахиргу вайксса агьулданува ливтIуссар 350-нния ливчусса инсан, Бесланнал агьулданул 1%. ЛивтIуминнавух хъами-оьрчIру бакъасса, ливтIуссар гай хха­ссал буллай бивкIсса аьралиталгу. ЛивтIуминнал бачIи бивкIссар балугъравун къабувхсса оьрчIру. ЗахIматсса цIунцIияртту хьуссар 500-нния ливчусса инсантурайн. Бесланнал школалий ясирну бувгьусса агьали ххассал буллали­сса бита-ххитавриву оьрмулуцIа увссар 31 террорист. Ца къачагъ увгьуну, судрухьхьун уллуссар. Яла махъ къачагътурал бакIчину ивкIшиврий мукIру хьуссар террорданул иширая махъ оьрмулухун дуснакьравун авкьусса Шамил Басаев. Бесланнай хьусса террордания махъ, Аьрасатнаву школартту лавсъссар къаралданулун.
Шиккува дакIнийн бутанну, щала Аьрасат цаххаххиндарал бувсса Бесланнал школалийсса террорданул ишираву оьрмулуцIа хьушиву жула ла­кку оьрчI, ЧIяйннал шяравату­сса Сулайманов Шамилгу. Аьпа баннав цал!
ХIакьинусса кьини дунияллий инсаниятран ца яла ни­гьачIимур зат хъанахъи­ссар терроризм. Къаккакканнав цуя-ца оьрчIан дяъвилул ва оьхIал­шиврул сичча.