Сентябрь зурул мяйнний, Дагъусттаннал халкьуннал шаэр Расул ХIамзатов увсса кьини МахIачкъалалив Лениннул Комсомолданул паркраву дайдирхьунни «КIяла кьурукьирттал кьинирду» тIисса фестиваль. Ва шаэрнан хасну гьар шинах дувайсса щаллагу дунияллул халкьуннал дянивсса литературалул фестивалли. Гьашинумур зувиллий ххюйлчинмурди.

Мероприятие дайдирхьунни СаллатIнал гьайкалданучIа тIутIив дишаврийну. Республикалул ХIукуматрал вице-премьер Муслим Телякавовлул, махъ лахълай, кIицI лавгунни, Расул ХIамзатов яру мазрай назмурду чичлай ивкIхьурчагу, щалвагу Дагъусттаннал, щалвагу Аьрасатнал арсну хъана­хъишиву. Ванал чIурчIав дунни литературалул фестиваль аьрая зана къавхьуминнал аьпалул литературалул мажлис хъанахъишиву.
Хасну ва фестивальданий гьуртту хьун увкIсса хъамаличунал, Аьрасатнал Чичултрал союзрал председатель Николай Ивановлул бувсунни «Кьурукьру» тIисса шеъри, чIярусса шинну ларгун мукьахгу, совет саллатIнал гьунар хъама къабитантIишиву исват буллалисса бушиву. Ихтилатру бунни Дагъусттаннал Чичултрал союзрал вакилтурал ва цайми регионнаяту бувкIсса чичултралгу.
Вара кьини Дагъусттаннал БакIчи Сергей Меликов хIаласса делегациялул Тарки-Таулийсса шаэрнал гьаттай тIутIив дирхьунни.
ДакIнийн бутанну, 2023 шин Аьрасатнаву Расул ХIам­затовлул шин хIисаврай кIицI лагантIишиву, хасъсса хIукмулий Аьрасатнал Президент Владимир Путиннул июль зуруй къулбас дуршиву.