«ЧIярусса шинну гъурбатрай дуварчагу, чIири къалирчIссар ттуву ватандалухсса ччаву. Бюхъай хIатта хъиннура хъунна хъанайгума дикIан, шинну наниссаксса».
Машгьурсса балайчи, Дагъусттаннал халкьуннал артист, жяматийсса ишккакку, «Платформа диалога России и Турции» тIисса идаралул председатель, Ватандалия ИстIамлив ивзун цимирагу шин гьарчагу, Лакку улча, Дагъусттан дакIнийнувасса жула АхIмад АхIмадовлун Турциянавусса Аьрасатнал Вакилханалул чулухасса ХIурматрал грамота дуллуну дур, Аьрасатнащалсса арарду цIакь дуваву мурадрай ва Аьрасатнал культура тихгу гьаз дуваву мурадрай ванал дуллалисса давурттан лайкьсса кьимат бивщуну.
– Аьрасатнал билаятрал кьатIувгу ттулла даврин лахъсса кьимат бищаву ттун, гьай-гьай, тIааьнну бур. ЧIярусса шиннур ттул, кьадарданул увцуну, Турциянаву яхъанай. Бюхъаймур буллан икIара ттула билаятрангу мюнпатсса, учIисса чув ушиву ккаккан буван. ЧIярусса шинну гъурбатрай дуварчагу, чIири къалирчIссар ттуву Ватандалухсса ччаву. Бюхъай хIатта хъиннура хъунна хъанайгума дикIан, шинну наниссаксса. Нава гуманитар дунияллий къуццу тIутIисса творчестволул инсангу ухьувкун, щиннияргу хъинну ттунгу бувчIлай бур культуралул личIи-личIисса билаятирттал агьлугу дус буллан, гъан буллан аьркиншиву. Турциянаву чIявусса бур Аьрасатнал культуралия хавар бусса, Аьрасатнал таварих, политика, магьирлугъ, литература лахьлан ччисса. Мукунма жу экономикалул дахIавурттугу цIакь дувансса ххуллу-чаранну ляхълан бикIару. Гьаннайсса, кIивагу билаятран къулайсса чаранну лявкъуну, шаймур буллай буру, — тIий ур жула лакрал арс.
ДакIнийн бутанну буккултрангу, АхIмад АхIмадов ИстIамлив яхъанай ушиву 1996 шиная шинай. Цала тIийкун, школалий, институтраву дуклакисса чIуннардийва жяматрал оьрмулул иширттавух чялишну гьуртту хъанай ивкIсса, укунсса давурттал биялагу ххуйну кIулсса, биялсса опытгу бусса ванал ва чулухунмайсса цала бюхъу-гьунар ккаккан бувунни чил кIанайгу.
