Ва нюжмардий «Дагестанская правда» кказитрал редакциялий хьунни «ХIакьсса Дагъусттан» тIисса проектравух гьуртту хьун гъира бусса жагьилтурая аьрзарду кьамул буллай байбивхьушиврин хасъсса ва цурда проектрая гьарта-гьарзану бусласисса пресс-конференция. Ялун нанисса ник ватан ххирану тарбия баврин хасъсса ва проект республикалий щурущи дувантIиссар ДР-лул БакIчинал чулухасса грантрал кумаграйну. Проектравух гьуртту хьун бюхъантIиссар Дагъусттаннал культура ва тIабиаьт ххал дигьлан ва хъирив лаллан гъира-шавкь дусса республикалиясса жагьилтураща бакъасса, билаятрал цайми регионнаясса жагьилтуращагу. Аьрзарду кьамул буллантIиссар сентябрьданул 1-ннин.
Проектрал каялувчи Рустам ХIамидовлул бусаврийну, Дагъусттаннай укунсса журалул проект щурущи дан вайннан дакIнийн багьну бур АьФ-лул Минпросвещениялул конкурсрай гьуртту хьуну махъ, ванил мурад бур жагьилтуравун Дагъусттаннал тарихгу, культурагу, тIабиаьтгу, миллатирттал аьдат-эбадатругу ххал дигьлан, цIулаган дуллан ва ми машгьур дуллан гъира бутансса. Ва проектравух гьуртту хьусса гьарнаву ва даврия махъ ххуйсса асарду хIасул хьунтIиссар ва гьарнаву личIи-личIисса бюхъу-хIарачатру чантI учин бантIиссар.
Проектрал арт-директор Кказанбаг Якьубхановлул бувсуна ххю-ххюя гьурттучитурая сакин дурсса экспедициярттал кьюкьрахь ихтияр дикIантIишиву шанма бутIуйх дарчIусса конкурсру гьарнал цанна-цанна язи дугьан.Цавайннаща бюхъантIиссар ттигу чIявучин къаккавксса, интернетраву ва СМИ-рдаву чанну зумух ласайсса, туристътурал дяниву къаишласса Дагъусттаннал тIабиаьтрал кIанттрудаясса фильм-ролик хIадур дан.
Цавайннащагу бюхъантIиссар Дагъусттаннал тарихраву хьусса цумур-цагу ишираясса, республикалул культура ва аьдат-эбадатру ккаккан дуллалисса ролик хIадур дан, цавайннащагу мува куццуй бюхъантIиссар цания-ца миллатрал аьдатирттаясса, хъатIи-хъиншивриясса ролик хIадур дан.
Проектравух гьуртту хьун бюхъантIиссар оьрмулул 18 шин хьусса цума-цагу аьрасатлувнаща. Видеороликру хIадур дурну махъ, миннува язи дугьантIиссар яла ххуйми ва яла ми соцсетирдай ккаккан дувантIиссар. Ва бутIул хъирив, МахIачкъалалия арх бакъасса «Журавли» тIисса санаторийлий хьунтIиссар циняв гьурттучитуран дакIний личIантIисса, конкурсирттал ва шадлугъиртталмур бутIлуя сакин дурсса жагьилтурал слет. Шиккугу Дагъусттаннал сипат чIалачIи дуллалисса, жулла республикалий хъамал кьамулгу бан, тIайлагу буккан кIулшиву, хъамаллурал кьимат бушиву ккаккан буллалисса мероприятияртту нантIиссар.
