Дагьунни уттигу лакрал литературалул ца ххярагьала

Дагьунни уттигу лакрал литературалул ца ххярагьала

Лешлай бур ца-цаних лак­рал литературалул яргсса цIуртти. Дагьунни уттигу лак­рал литературалул ца ххярагьала.

Август зурул ацIунний лавгунни дунияллия Дагъусттаннал халкьуннал шаэр, Дагъусттаннал культуралул лайкь хьусса зузала, республикалул паччахIлугърал ва Расул ХIамзатовлул цIанийсса премиярдал лауреат Ссугъури Увайсов. Ва тамансса шиннардий зий ­уссия «ЧIавалачин» ва «ЦIубарз» журналлай, чичайва оьрчIансса ва хъуниминнансса произведенияртту. Ванал оьрчIансса хъярчийсса хаварду бувкссар «Мурзилка» ва «Крокодил» централ журналлай. Шаэршиврул бакъагу, Ссугъури Увайсовлул бия художникнал гьунаргу. 85 шинал юбилейран хасну дурссия ванал суратир­ттал выставка. Таман­сса луттирдал авторди. Ва дунияллия лагаву лакрал миллатран хъунна­сса къумашивур. Ца зумату кунма лакралгу, къалакралгу агьлу, Ссугъури Увайсов дакI-аьмал хъинсса интеллигент, инсаншиву дусса, хьхьичIун урувгсса, инсаннан къаччан бикIан къабай­сса ия тIий бур.

Лакрал литературалувугу, жула «Илчи» кказитрал редакциялул оьрмулувугу биялсса кIану бувгьуну ивкIсса инсан, гьунар ххисса чичу, шаэр, пуб­лицист Давдил арс Ссугъури Увайсов жуятува батIул шаврийн бувну, хъуннасса дард-хажалат кIидачIлай буру Ссу­гъурил ичIувацириннахь, гъан-маччаминнахь ва щалагу Ваччиял жяматрахь.
Цал бунагьирттал аьпа баннав, рухI рахIатний дишиннав.
«Илчилул» коллектив

Читайте также: