Ларгсса нюжмардий Хабаровскаллал улклуй ХIукуматрал председательнал хъиривчуну ивтун ур Дагъусттаннаясса Кьурбаннул арс Карим Ссунгъуров. Ванайн тапшур бувну бур крайрал строительствалул масъалартту щаллу буллан.

Хабаровскаллал улклул губернатор Михаил Дектеревлун Карим Ссунгъуров кIулну ур вай кIиягу Ухссавнил Ккавкказуллай цачIу зий бивкIшиврийн бувну.
Ванащалсса кIулшиврия губернаторнал чивчуну бур Инстаграмравусса цалла лажиндарай.
— Карим Ссунгъуровлул каялувшиврулу уттинин билаятрай дурссар агьали яхъанансса 1,5 азаруннияргу ххишаласса къатри. Хъинну ххуйну кIулссар ванан школарду, детсадру ва цаймигу социал идарартту баврил хIалкьазиягу. Жул улклуй аьркинну ия ва аралуву ххуй­сса опытгу, кIулшивурттугу, пишакаршиврул даражагу лахъсса къуллугъчи. Аьркинну ия жаваблувсса ва дакI марцIну зунсса пишакар, – тIий чичлай ур Михаил Дектерев социал сетьрай.
Ва къуллугъращал барчагу уллай, цала ватанлувнан тIай­лабацIу чIа тIий ур жула хIурмат бусса, Архмур Восток ва Арктика лябуккавриха зузисса министерствалул 1-ма хъиривчу ХIажимахIаммад ХIусайновгу:
– ХIурмат бусса Карим Кьурбанович, чIа тIий ура му цIусса къуллугърай вин тIайлабацIу ва каши-кьудрат. Ина жул министерствалучIасса Депортаментрал директорнал къуллугърайва ккаккан бувунни вийнна дирхьусса вихшала щаллу дан бюхъайсса, жаваблувсса пишакар ушиву. Вила пиша ххирашиврул ва мунил гьарца шачIану кIулшиврул ина цимилгу тас­ттикь бувссар лажин кIялану вийва бивхьумур лахъсса даражалий щаллу бан бю­хъайсса каялувчигу, сакиншинначигу ушиву. Ххишала акъа ххарира ва пахрулий ура ина куна­сса ватанлув ушиврия!».
Ва къуллугърай итан хьхьичI Карим Ссунгъуров зий ивкIун ур ялувгу кIицI був­сса куццуй АьФ-лул Архмур Восток ва Арктика лябуккавриха зузисса министерствалучIасса Департаментрал каялувчину. Ванал бур MBA «Moskow Business School»-данул степень.
Карим Ссунгъуров ур юрид­ий элмурдал кандидат ва «Да­гъусттаннал лайкь хьусса строитель».
2011 шиная 2018 шинайнин Ссунгъуров зий ивкIссар «Новострой» «Дирекция строящихся объектов» тIисса паччахIлугърал унитар предприятиялул директорнал цалчинма хъиривчуну.
2018-2019 шиннардий Ма­хIачкъалаливсса «Главное воен­но-строительное управление №4» ФГУП-рал хъунаманал мас­лихIатчину.
2021 шинал февральданий ва ивтун ивкIссар АьФ-лул Архмур Восток ва Арктика лябуккавриха зузисса министерствалучIасса Департаментрал каялувчину.