Августрал 25-нний ДР-лул ХIукуматрал Председатель АьбдулпаттахI Амирхановлул ххал бивгьунни МахIачкъалалив цIуну бувсса 2 оьрчIал багъ тIитIин хIадурну бушиву.
КIиттурша оьрчIансса ттизаманнул оьрчIал багъ бувну бур Сулакьуллал шяраву ва 200 оьрчIансса багъ – ДОСААФ микрорайондалий. Ми оьрчIал багъру бувну бур «Демография» тIисса нацпроект бартдигьаврил лагрулий.
МахIачкъалаллал бакIчи Салман Дадаевлул бувсунни объекру дузал бувну бушиву аьркинсса инфраструктуралул, бувцуну бушиву газ, ток, щин. АьбдулпаттахI Амирхановлул тапшур бунни хIачIайсса щинал ххуй-оьккишиву ххал дуван. Мунал ихтилат бунни оьрчIал багъирдал каялувчитуращал ва зузултращал, цIувххунни цуксса рязину буссарив микку дурсса давурттая. Ххал диргьуну махъ кIул хьунни цаппара диялдакъашивуртту ттигу лирчIун душиву.
ХIукуматрал Председательнал аьмну хъинчулийсса кьимат бивщунни объектирдал тагьарданин. Мунал тапшур бунни лирчIсса диялдакъашивурттугу духлаган дуван оьрчIру кьамул буван хIадурну бикIаншиврул.
