Лахьхьи хъинбалартту буллан

Дагъусттан Республикалий най дур акция: «Гъи хъиншивурттай гьан дуванну» тIисса цIанилу. Жугу, Ккуллал шяраваллил библиотекалул зузалт, гьуртту хъанай буру ва давривух. «Хъиншивур­тту дуллалияра» тIисса иширал ца мураднугу хъанай бур ялун нанисса никиран лахьхьин баву инсаннал чIарав ацIан, кумаг буван.

Жугу шяраваллил библиотекалуву хIасул дуллай буру буккултращалсса хьунабакьавуртту. Бувну буру уголокру, лахъан дурну буру чIирттайн суратру. ОьрчIан яла гужну зат бувчIин буван бю­хъайсса литературалун ккаллину бур магьри. Жу, мукун оьурчIру бавтIун, вайннахь буслай ва ккалай бикIару магьри. Вайннал цалагу бусай бувккусса магьри ва гайннул ци тIиссарив.
Уттигъанну шиккун бувкIсса оьрчIал ихтилат бувуна цала був­ккусса Н. Телешевлул чивчусса «КIяласса кьурукь» тIисса магьлуяту ва Паустовскийл чивчу­сса «Гъилисса ччатI» тIисса хавардал луттираяту.

Вай хавардаву бувсун бур инсан цукунсса икIан аьркинссарив, хъиншиву, хъинбала цирив. Оьши­ву дарчан, га махъуннайгу зана дикIан бюхъайшиву.
Жу хIарачат буллан бикIару луттирдайхчIин оьрчIан ххуймур лахьхьин буван.

Аьйша ХIажиева,
Ккуллал шяраваллил
библиотекалул каялувчи