Август зурул 25-нний хьунни инсантурал ахIвал-хIал лавай баву мурадрайсса, арцуйнусса кумагру баврил сипта хьхьичIун ласласисса «Справедливая Россия – за Правду» партиялул щалагу Аьрасатнал пресс-конференция. Дагъусттаннайсса партиялул отделениялул республикалул СМИ-лунсса конференция дунни «Дагестан» РИА-лул редакциялий.
Шикку ихтилатру бунни АьФ-лул ПаччахIлугърал Думалул миллатирттал иширттал комитетрал председатель Валерий Газзаевлул, Дагъусттаннал парламентрал вице-спикер, Региондалийсса «Справедливая Россия – за Правду» партиялул отделениялул председатель Камил Давдиевлул, ДР-лул Халкьуннал Мажлисрал кIулшивуртту дулаврил, элмулул, культуралул, жагьилтурал иширттал, спортрал ва туризмалул комитетрал председатель, партиялул бюрорал советрал секретарь Мурат Пайзуллаевлул ва «Молодежь СПРАВЕДЛИВОЙ РОССИИ» суккушиндарал координатор, Дагъусттаннал Халкьуннал Мажлисрал депутат Марат Аьлияровлул.
Валерий Газзаевлул балжину бувсунни инсантурал оьрмулул шартIру къулай даву мурадрай, партиялул сукку дурсса сипталия. Ванал кIицI лавгунни партиялул хъирив лавну ххал диргьушиву ва сипта дузрайн дуккан дансса экономикалул шартIру цукунсса дуссарив. Август зурул 25-нний «Справедливая Россия – за Правду» партиялул чулуха ХIукуматрал хьхьичIун ларсунни январь зурул 1-нния 2022 шинал агьалинал доходру гьаз даву мурадрайсса выплатарду дуллай байбишаврин хас дурсса законопроект.
Камил Давдиевлул бувсунни, укунсса давуртту дачин дурсса хIукуматирттай агьалинал оьрмулул шартIру къулай хьуну душиву. Му бакъассагу, вай экспериментру буллай бивкIсса хIукуматирттай мискинсса ва ахIвал-хIал кIюласса агьалигу чан хьушиву, ягу бувагу бакъашиву.
Ахирданий Валерий Газзаевлул ва партиялул вакилтурал журналистътурал суаллахьхьун жавабру дуллунни.
