Хъуннасса кьурчIишиву цал ттигу дирунни Магьдихъал агьулданийн. Оьрмулул 88 шинаву аьпалухьхьун лавгунни Ккурккуллал шяраватусса Аьвдулвагьаблул арс Магьдиев КьурахIажи.
Хъинну хъунмасса бия КьурахIажинал хIурмат-иззат цала агьлу-авладрал дянивгу, Ккурккуллал жяматрал дянивгу.
Ванал лекциярттах вичIи дирхьусса студентътал, цачIу зий бивкIсса уртакьтал мудангу барчаллагьрай ва кьадру-кьиматрай кIицI дуллайнма бикIайссар КьурахIажи Магьдиевлул цIа, буслан бикIайссар, ва хъамаитансса акъая тIий.
Цува ччаннай авцIуну махъсса ванал оьрму лавгссар цаярва мюрщими тарбия буллай, ми оьрмулул ххуллурдайн бичлай. Львов шагьрулий ванал ххаллилну къуртал бувну бивкIссар Машлул ва экономикалул институт. ХIалал дурссар экономикалул элмурдал кандидатнал цIа.
Зий ивкIссар Орел шагьрулий финансирттал институтрал кафедралул каялувчину. Дагъусттаннайн зана хьуну мукьах зий ивкIссар МахIачкъалаллал Ленинский райондалул Потребсоюзрал хъунама бухгалтерну Къарабудагъкантлив, Дагпотребсоюзрал ревизион комиссиялул председательну.
Махъсса шиннардий зий уссия Дагъусттаннал паччахIлугърал университетраву преподавательну. Зий ивкIссар машлул ва экономикалул факультетрал деканну. Лайкь хьуссар профессорнал цIанин.
КьурахIажи аьпалухьхьун лагаврил пашманшивугу кIидачIлай, дакIнийхтунусса жижара буллай буру ванал ичIувацириннахь, уссур-ссуннахь ва махъсса цинявппагу мачча-гъаннахь. Цал бунагьирттал аьпа баннав, имандалий лавгун лякъиннав!
Ккурккуллал жямат