Ласун бигьар, зана дуван захIматри

Уттисса заманалул чIун дур, хъинну анаварсса мутталий ишру щаллу буван багьлагьисса. Ми щаллу бувангу, гьай-гьай, аьркин хъанай дур арцу. Инсанталгу, ттул пикрилий, цахъис ялун бучIантIимунил чулинмай пикри-зикри ссуссукьуну буллай бурив къакIулли. На учин ччай ура телефоннавух, телевизордавух, чIирттайн лачIун дурсса баян бавурттайну инсантурайн оьвтIий бур, зул аьркинсса ишру щаллу буван, жу дулунну зухьхьун арцу тIий. Яний, арцу буржирай дуллуну, арцу ляхълай. Яла бур гай буржирай ларсъсса арцу зана дуван къабюхълай, авара хъанай. ХIасил, чIалай бур ца жучIава Дагъусттаннай ба­къагу, щалагу Аьрас­тнаву ва арцу буржирай дулаврил ишру Махнолул тIисса «Анархия мать порядка» тIисса мукъур­ттиха лахьлай бушиву.
На шяраву къатри дуллай айивхьусса чIумал ларсъссия банкрая кредитрай, къатрал магъи дишинсса тахтардах, муххардих, зузалтрангу дулунсса 150 азарда къуруш. Явара цирдагу бигьану, ца-кIира ссятрал мутталий дуллуна. Яла ттун зана дуван багьуна гай 150 азарда къурушрал ялун ялагу 90 азарда къуруш. Яний, на банкран дуллуссия 240 азарда къуруш. Вана укун буру жува хъямала буллай. Шиккува кIицI буван ччива, ялагу дур, словарьданийвагу бакъасса, «Ипотека» тIисса махъгу хIасул бувну, къатри ласун ччинан арцу дуллай. Инсантурал бусласаврийн бувну, гай арцу гайннан цивппа литIуннин дуллан багьлай бур. Мунияту, арцу буржирай ласуннин, цал хъинну пикри буван багьлай бур, гай цукун дулун хьунтIий бурив хIисавравун лавсун. Акъарив, пикри къабуварча, инсан захIматшиврухун агьлай ур.