ДР-лул Минздраврал официал сайтрал баян бувсса куццуй, ведомствалул каялувчи Татьяна Беляевал бусаврийн бувну, хIакьинусса кьининийн республикалий коронавирусрал инфекциялул цIуцIаву яларай дагьну духьурчагу, чан хьун бувану бур литIлатIими. Республикалул азарханардай ва реанимациялул отделениярттай ттигу чIявусса бур захIматну къашавайсса.
Хъин хьуну итабавкьуминнал аьдад азарханалийн багьлагьиминнаяр хъун хъанай душиврийн бувну, «ятIул зонардайсса» тахру хIалли-хIаллих чан буллай байбивхьуну бур. Август зурул 25-ннийн COVID-19 азарданул ва внебольничная пневмониялул къашавайми уттубишин бан 64 медициналул идаралий бивхьуну бур 5 835 тах. Шамилчинмур щатIи яла къизгъинмур чIумал ми тахру тIитIин багьну бур 6500 ливчусса.
Республикалул стационардай хъин хъанай усса ур 4 329 къашайшала внебольничная пневмония дусса ва COVID-19 азардануйн щак бусса.
Ларгсса кьини уттуишин увну ур 334 къашайшала (хьхьичIмур кьининияр 26 инсан чансса). Хъин хьуну итаавкьуну ур 500 инсан.
Санитар авиациялул отделениялул вертолет 2021 шинал 120-лла лерххун дур къашавайми буцин, вайннува 46-ла лерххун дур COVID-19 азарданул ва внебольничная пневмониялул къашавайми буцин.
ХIакьинусса кьининийн республикалий коронавирусрал инфекциялийн къаршисса вакцина бувну бур 354 547 инсаннал, вайннава 252 878 инсаннал бувну бур кIивагу прививка, 101 669 – цалчинмур. Вакцина бан аьркинсса агьалинава цIанасса чIумалнин бувну бур 26% агьалинал. Бан багьлай бур 60% бугьарасса агьалинал, 18 шин бартларгсса 1 350 407 инсаннал.
«Махъсса зурдардий республикалий вакцина баву чIаланну лахъ хьурчагу, махъсса нюжмардий лагь хьунни вакцина баврил бущи. МуницIун бавхIуну, агьалинал къулагъас дурну ччива цалагу, цала лагма-ялттуминналгу цIуллушиву дуруччаврих.
Аьрасатнал Минздраврал баххана бувну бур вакцина бавринсса маслихIатру. Коронавирусрал инфекция дурхIусса ягу дачIи шинал хьхьичI вакцина бувсса 60 шинава увксса инсаннан бучIи бувну бур «Спутник Лайт» вакцина бан. ВИЧ ва онкологиялул цIуцIаву дусса къашайшалтран чара бакъа бан ккаккан бувну бур «Спутник V» вакцина.
Вакцина буллалиссар ми буллалисса пунктирдай хIакиннал ххал увну махъ дачIи ссятрал дянив, – увкунни Татьяна Беляевал.
