ХIакин ва цIимилул ссу. Вай мукъурттил жула оьрмулуву бувгьунни хъунмасса кIану. ХIатта, жува вайннах муксса вичIи дихьлай бакъахьурчагу, вайрив шаймур буллай бур жува ххассал буван. Иширах бургарча, ва ялун дирсса коронавирусрал цIуцIаву хъанай дур вайннал фронтрал хьхьичIалуну.

Ккуллал райондалул жяматирттал ялув бавцIуну бур цIуллушиву дуруччаврил зузалт. Вай цала даву дуллай бур дакIнийхтуну.
Уттигъанну ттуйн телефондалувух оьвкуна, Ваччав яхъанахъисса Хъун дяъвилул гьурттучинал щащарнил, Муслимова Нурижатлул: «Аьркинну урача шавайн ттучIан ухху», – куна. Нурижатлул цIуцIаву хъин дуллай гьантри бувну бия Ваччавсса азарханалий. Ва хъинну рязину бия цихва буруглай бивкIсса хIакинтурая ва медсестрахъая. Ванил кIицI увуна азарханалул хъунама хIакин Щамхалов КьурбанмахIаммад, хIакин МахIаммадов МахIаммад, медсестрахъул Барххуева Ххадижат, Чупанова БатIа, санитаркахъул Аьбдуллаева ХIулайбат, Валиева Суджана. Нурижатлул бувсуна, вай кIицI бувсса инсантал, цала ниттихъах кунма, хъисгу личIишиву дакъа буруглай бивкIшиву. Ца-кIива зурул хьхьичI цила ккарччив дирхьусса Ккуллал шяравасса Оьмаров Халидлул цIагу барчаллагьрай кIицI дуруна. Ва махIаттал бувну бия ванал кабинетравусса марцIшиврул, аьркинлугъирттал щаллуну бушиврул. Хъиннихха укун жула хIакинтурая инсантал рязину. ЦIуллу баннав зу.

2020 шинал мартрая байбивхьуну Ккуллал райондалул азарханалийн уттубишин бувну бур COVID-19 диагноз ккаккан дурсса 267 къашайшала ва гьутрурдал азар дусса 199 къашайшала, хъин хьуну ур 401 инсан.
Августрал 11-ннийн Ккуллул раондалий вакциналул ххалаххив бувну бур 1072 инсаннайн.
Коронавирусрал азардания буруччинсса чаран хIакьинусса кьини бур так вакцина. Прививка къадурнура лархъсса азарданул хъунмасса зарал биян байсса бур инсаннал цIуллу-сагъшиврийн. Мунияту пандемиялул мугьали бацIан бансса ца ххуллу-хха хъанай бур вакцина баву.