Чириссар лелуххантран дукия дичаву

Чириссар лелуххантран дукия дичаву

На ттула макьалалуву цакьнивагу кIицI бував зунттавусса шяраваллаву, лагма-ялтту хьхьичIава бивкIсса личIи-личIисса лелуххант чан хьуну бушиву. ЧитIри бувагу бакъар, хьхьиругу чанну бакъа-бакъар. Къягърал чIувагу къабаяй. Амма вяркъумур бувар зунттавату арх хьун. Ванил бусай инт нанишивриягу. Лелу­ххант зунттавату чан шаврин багьана вайннун дукия чанну душиву кунма чIалай бур. Циван учирча, шяраваллаву диркIсса колхозру «хъюртул щинайн» дур­ккун, хъуру къадугьлан бикIайхту, лелуххантрансса дукия чан хьуну духьунссар. Хъуру дугьлай ба­къар, аьркинмургу базаллува ласлай бур.
Инсаннан кIулну бикIан аьркинссар, тIабиаьтравусса баланс зия хъанахъисса чIумал, ци-бунугу ца иш ялун личайшиву. Бугьараминнан дакIнийссар, ца ппурттуву Китай тIабиаьтравусса чIелмултгума бат буллай бивкI­шиву. Ттун ккавкссар телевизорданувух ккаккан буллай, щаллу­сса кьай духхай машина ливтIусса чIелмултрал бувцIуну нанисса.
Инсаннал аькьлу-кIулшилул дуламантту кIура даллалаврил ишругу, валлагь-биллагь кIул дуван къашайсса дикIай. Мунал аьркинну бур цала кулпатравусса буруккинттащал лагмасса тIабиаьтралми «буруккинттугу» оьрмулуву лаласлан.
Нагу хIарачат буллан икIара ттула къатрал кьанчуллалу мина дирхьусса хьхьирунтран дукия чан къадуван. Уттигъанну хIисав хьунни, ттула аьнакIан кIюрххил бичлачисса къалмучIан, ттулами хьхьиру бакъассагу, цаймигу букIлай бушиву. Яла ттухь ца гьалмахчунал бувсуна, хьхьиру къалмул кьункьайн бучIайшиву. Мунияту нагу вайннунссагу ца тIамакь къалмул ххи дувара аьнакIан дичлачиминнуяр. Хьхьиру цивппагу хъинну му­гъаятсса лелуххант бур. Учин му­къун, вайгу жущалва дусъсса, жула къушлий цаламур «къуш» бишлашисса лелу­ххант бурхха. Чири­ссар лелуххант­ран дукия дичаву.

Читайте также: