Цинагу, миллатрангу ххирасса лас Киров Абакаровичлул хъирив анаварну лавгунни бусравсса, аькьлу-кIулшилул, духIин-дуциндарал бувччусса хъамитайпа, аьлимчу, жяматрал ишккакку АхIмадлул душ Гулизар Султанова.
ЗахIматну бухьунссия вайннан батIулну ялапар хъанан. Мукунни тIар лагайсса ва дунияллий мяйжаннугу цаннан ца ххирасса лас ва щар.
Жижарагума вайннан личIи-личIину чичин кьисмат къавхьунни.
Лакрал миллатрал культуралуву Киров Абакаровичлул дурмунил кьимат бищун къабигьар. Циксса лакку жагьилтуран кумаг бувссар ДГПУ-лул музыкалул факультетрал деканну зузисса шиннардий.
Лакрал миллатрал суккушиннараву хъуннасса хъар цалла хъачIунттайн ласлай ивкIссар. Гулизар Султанова Лакрал хъаннил «Дараччи» клубрал давуртту дайдирхьусса цалчинсса гьантрая шихунмай, дигьалагру дакъа зий бивкIссар миллатрал культуралуха му клубрал дуллалисса давурттаха. (Дайдихьулий даву нирхиравун дутан цуксса захIматссарив жунма кIулссар).
Гьарцагу давриву аьдилшиву ххирасса, даврил сант кIулсса Гулизар Султанова бувчIуссар «Дараччи» клубрал вице-президентну ва даччин дакъа, дакI тIайлану зий бивкIссар Мариян Илиясоващал архIал. ХIакьину «Дараччи» тIисса дакI-цIимилул ва кIулшиву дулаврил фондрал кьудрат-бюхъу бушивруву хъунмасса бияла буссар Гулизар АхIмадовналгу.
«Ххаллилсса», «бюхттулсса» тIисса махъру бакьлакьиссар Гулизар Султановал оьрмулуву бивзусса гьарцагу шаттирацIун, мунил оьрмулул бивхьусса гьарцагу бурж биттур баврил кьяйдалуцIун.
КIилчинни «Дараччи» клуб ятин хъанахъисса. Цалчин – Мариян Илиясова яла лавгсса чIумал, утти Гулизар Султановагу….
Ччинал дахIалай чинсса ппу, Киров ва Гулизар тамур дунияллийн архIал лагаврил кьурчIишиву кIидачIлай буру душ Светланахь, арс Абакардухь, Лакрал миллатрахь, Куллал ва Кумиял жяматрахь ва Лакрал театрданул коллективрахь. Киров ва Гулизар абадлий жула дакIурдиву личIантIиссар.

Гульшан Хасаева