Ца чIивисса мутталул дянив жула дянива лавгунни kакрал миллатрал рухI-ссихIну бивкIсса, миллатралгу щала республикалулгу оьрмулуву агьамсса кIанттурду бугьлай бивкIсса инсантал: Дагъусттаннал халкьуннал шаэр Ссугъури Увайсов, жяматийсса ишккакку ХIасан-ХIусайн Камалов, аьлимтал, магьирлугърал хьхьичIунсса ишккаккулт Киров ва Гулизар Султановхъул.
Цал бивкIулул мискин бунни Дагъусттан. ДакIнийхтуну хъуннасса кьурчIишивугу кIидачIлай, жижара буллай буру вайннал кулпатирттахь, гъан-маччаминнахь, шяраваллал агьулданухь, щала лакрал миллатрахь.
Цал рухIру хъинний дишиннав, алжаннул ххари баннав! Махъ ливчIминнал оьрмурдай барачат бишиннав!
Лакрал райондалул администрация
Хар-хавар бакъа хъуннасса дард-хажалат дирунни жула цинявннал ялун – Султановхъал агьлу-авладрайнгу, Ккуллал ва Кумиял жяматрайнгу, щалагу лакрал миллатрайнгу.
КIива гьантлул дянив цаннал хъирив ца жуятува батIул хьунни лакрал илданул дянив бур учинсса арс ва душ – Киров ва Гулизар Султановхъул.
Цува цувалу лавсун, ми кIинналвагу лакрал ва дагъусттаннал культуралул ва магьирлугърал дунияллий бартбигьлай бивкIссар цаннияр ца хьхьичIунсса ва язисса мурадру, агьамшиву ххисса давуртту. Ми лавгун мукьах жува биялну мискин хьуссару.
ДухIан захIматсса пашманшивугу кIидачIлай, жижара буллай буру Кировлул ва Гулизардул арснахь ва душнихь, махъсса цинявппагу уссур-ссуннахь, гъан-маччанахь.
Цал бунагьирттал аьпа баннав, кIирагу рухI рахIатний дишиннав.
Ссапарбаг Аьбдуллаевлул щалагу кулпат, Вираттиял жямат
ХIайп, лавгунни лакраву бур чинсса, цала кIулшивурттайну, миллатрал цIаний дуллалисса хъин-хъинсса давурттайну, цала интеллигентшиврийну, цIубуну, чIявучин бусравну оьрму бувтсса, чин ккаккиялунсса кулпат дузал бувну бивкIсса Киров Абакарович ва Гулизар АхIмадовна. Къавхьунни Гулизардуща цина ххирасса Киров акъа кIива гьанттавагу буван.
Щалагу миллатран пахрулунсса вакилтал Киров ва Гулизар цаннал ца хъирив ахиратрал хьусса хъуннасса кьурчIишиву кIидачIлай, жижара буллай буру арснахь Абакардухь, душнихь Светланахь, гъан-маччанахь, щалагу агьлу-авладрахь.
Зул рухIру алжаннул ххари даннав, имандалий лавгун лякъиннав, махънал оьрмурдай барачат бишиннав.
Зу жул дакIурдива тачIав къагьантIиссару.
1-мур ЦIувкIратусса Халиловхъал кулпат
Студентъсса чIумалсса ттул оьрмулул ккалли бансса бутIа бавхIуну буссия жула ххаллилсса, оьвхъусса, хъамаитан къахьунсса Киров АбакаровичлуцIун. Мура бусравшиву ххисса ва акьлулул бувччусса инсан бия Кировлул оьрмулул дус Гулизар Султановагу, мукунма хъамабитан къабюхъансса.
ДакIнийхтуну кIидачIлай ура миннал бивкIулул кьурчIишиву Султановхъал щалагу авладрахь.
АьбдурахIман Адамов
ГьунчIукьатIрал жяматрал чулуха жижара буллай, кьурчIишиву кIидачIлай ура жула ххаллилсса лаккучу, аькьлукар, шаэр, педагог, хъунмасса хIурматрал заллу, ттула дус Киров Султанов аьпалухьхьун лагаврил. Хъирив мунал ххаллилсса кулпат, Лакрал, Дагъусттаннал магьирлугърал зунтту, иминсса, ххаллилсса, жува ччисса, жунмагу ччисса, мудан жущаласса Гулизаргу накьлу шаврил жижарай буллай, дард кIидачIлай ура щалагу агьлу-авладрахь.
ХIажибутта ХIусайнов, ГьунчIукьатIрал ккурандалул председатель
ДакIнийхтуну дард ва кьурчIишиву кIидачIлай буру Дагъусттаннал халкьуннал шаэр Космина Исрапиловахь, мунил ххирасса уссу Марат
аьпалухьхьун лагаврийн бувну.
Ххирасса инсантуран бивкIу бакъассар, ми анжагъ жуятува ятри буцлацисса, жула дакIурдиву ми мудангу сагънува личIантIиссар.
Алжаннул агьулданувух ивзун лякъиннав вил аьзизсса уссу!
«Дараччи» клубрал душваврал цIанияту Гульшан Хасаева
