Ларгмур нюжмардий «Дагестанская правда» кказитрал редакциялий хьунни махъ заманнай, хаснува августрал байбихьулия шинмай хъиннува, Дагъусттаннай газ ххира циван хъанай буссарив бусласисса ва ДР-лул ХIукуматрал ва иширал хIакъираву ци чаранну кьамул бан хIадур хъанай буссарив бусласисса пресс-конференция. Республикалийсса газрал багьрал масъалалия бусан увкIун ия ДР-лул энергетикалул ва ЖКХ-лул министр Ризван Мурадов, АЗС-рттал Заллухъруннал ассоциациялул хъунама МахIаммад Абакаров ва ДР-лул УФАС-рал каялувчи Кьагьир Бабаев.

Аьрасатнал рынокрай углеводородрал газрал багьа ссайн бувну лахъ хъанай буссарив буслай, Ризван Мурадовлул кIицI бунни, агьаммур савав гьашину Европанаву кIи дяркъусса хьуну, экспортрайн нанисса газрал багьа лахъ баву душиву. Хаснува жулламур региондалий газрал багьа вайми регионнайнияр цахъи лахъну бушиврул сававгу дархIуну дур, цIана цаппара лухIи навтлил заводру бакьин буллалисса давуртту най душивруцIун ва жучIава цайми регионнах бурувгун газрай зузисса машинартту чIявусса бушивруцIун дархIусса.
«Дагъусттаннай бакъар хIу­кумат заллусса ччуччиялул цуппа-ца предприятие. Циняв АЗС-рттал бур цала-цала заллухъру ва миннахь ихтияр дур республикалул кьатIув цанма аьркинссаксса газ машан ласун. ХъунмурчIин республикалийн газ лавсун бучIайссар муххал ххуллийх», – бувсунни ванал.
Ризван Мурадовлул бусаврийну, ДР-лул Энергетикалул ва ЖКХ-лул министерствалул цIакьсса дахIаву дур республикалийсса АЗС-рттал Заллухъруннал ассоциациялущал ва икьрал дур вайннащал региондалул рынокрал низам дуруччин ва федерал даражалийсса багьана-савав дакъа ччуччиялул багьри лахъ къабуллан.
Ассоциациялул хъунама Ма­хIаммад Абакаровлул бусаврийну, цIана Дагъусттаннай АЗС-рттал 30% бур баххансса газ бакъа. ХIукуматрал мурадгу бур 9 долларданун диркIсса пошлина гьаз дан 69 долларданун. Ва иш сававнугу, ччуччия даххулт кIура баентIиссар билаятрал вивсса рынокрайн.
Дагъусттаннайсса УФАС-рал каялувчи Кьагьир Бабаевлул мукунма бувсунни республикалий аьмну душиву 800-ксса АЗС. Вайннал дянивсса конкуренциягу хIисаврайн ларсун, чIал къавхьуну газрал багьа лагь хьунтIишиву. Бувсунни ванал мукунма ва масъалалуцIун бавхIуну республикалий ччуччиялул монополия дакъашиву.
«Жу дурсса хъиривлаявур­ттайн бувну, Дагъусттаннай жун къаляркъунни ччуччиялул рынокрай 8 % бусса цурда ца АЗС. Рынокрай гуж бусса, процентру ххисса АЗС-раща бю­хъайссар ва багьлун газ бахханну куну, ца кьутIи дан. Дагъусттаннай бакъар мукун гуж бусса царагу АЗС.
Шиккува кIицI бан, Санкт-Петербургуллал халкьуннал дянивсса хъуслил биржалийсса тагьарданух бурувгун, махъсса гьантрай хIисав хьуну бур газрал ца тонналул багьа лагь хьушиву. Августрал 11-нний газрал тонна диркIун дур 50,25 азарда къурушран, цIана тIурча, дянивну тонна дацIлай дур 45,15 азарда къурушран. Конференциялул гьурттучитурал бувсунни, рес­публикалий газрал багьа лагь хьунтIишиву октябрьданий.